ოკუპირებული ცხინვალის დე ფაქტო პროკურორი, რომლის გადადგომასაც რამდენიმე დღეა ითხოვენ, თანამდებობის დასატოვებლად ულტიმატუმს აყენებს. არუზმაგ ჯაგაევის განცხადებით, დე ფაქტო პროკურატურიდან იმ შემთხვევაში წავა, თუ ე.წ. დეპუტატები, რომლებიც მის გადადგომას ითხოვენ და რომლებზეც, მისი მტკიცებით, მასალები აქვს, მანდატს დატოვებენ. ინფორმაციას ამის შესახებ ე.წ. სახელისუფლებო გამოცემა ავრცელებს.

ჯაგაევის თქმით, არსებობს საკმარისი მტკიცებულებები, რომ ამ პირების წინააღმდეგ დაიწყოს სისხლის სამართლებრივი დევნა და ისინი იყენებენ ცხინვალის ციხეში მოკლული კაცის საქმეს იმისთვის, რომ სასჯელი აირიდონ.

ოკუპირებული ცხინვალის რეგიონში ინალ ჯაბიევის საქმის გამოძიების მოთხოვნით საპროტესტო აქციები რამდენიმე დღეა მიმდინარეობს. მიზეზი წინასწარი დაკავების იზოლატორში 28 წლის, ინალ ჯაბიევის გარდაცვალება გახდა, რომელიც დე ფაქტო მინისტრის მანქანისთვის ცეცხლის გახსნის ბრალდებით დააკავეს.

გარდაცვლილის ახლობლების თქმით, მას ციხეში აწამებდნენ. აქციის მონაწილეები დანაშაულში პასუხისმგებელ პირთა დასჯას ითხოვენ.