სახალხო დამცველი, ნინო ლომჯარია გარდაცვლილი პროგრამისტის, თამარ ბაჩალიაშვილის საქმეს შეისწავლის. ლომჯარიას განცხადებით, ის მზადაა საქმის შესწავლის პროცესში ჩაერთოს და ოჯახის ადვოკატთან ერთად სისხლის სამართლის მასალებს გაეცნოს. სახალხო დამცველი, ასევე, გეგმავს გენერალურ პროკურორ, ირაკლი შოთაძეს შეხვდეს და საქმესთან არსებულ კითხვებზე პასუხები პირადად მისგან მოისმინოს.

"პროკურატურა სახალხო დამცველს აძლევს სრულ დაშვებას საქმის მასალებზე, ამ გარემოების გათვალისწინებით, მნიშვნელოვანია პირადი შეხვედრა გენერალურ პროკურორთან, რადგან დაზარალებული მხარის განცხადების, სწორედ ირაკლი შოთაძისგან მიიღეს გარკვეული დაპირებები გამოძიებასთან დაკავშირებით", — განაცხადა ნინო ლომჯარიამ.

სახალხო დამცველის განმარტებით, ამ ეტაპზე საქმის მასალებთან დაკავშირებით არაერთი კითხვა ჩნდება.

პროგრამისტი, თამარ ბაჩალიაშვილი 2020 წლის 18 ივლისს გაუჩინარდა. ის 5 დღიანი ძებნის შემდეგ საკუთარ მანქანაში გარდაცვლილი იპოვეს. საქმეზე გამოძიება თავისუფლების უკანონო აღკვეთის მუხლით დაიწყო, შემდგომში ბრალდებას თვითმკვლელობამდე მიყვანის მუხლი დაემატა.