ორშაბათს, 31 აგვისტოს, Netflix-მა თავისი ახალი საშინელებათა სერიალის, The Haunting of Bly Manor-ის, ტრეილერი გამოუშვა. შოუ სტრიმინგის სერვისზე 9 ოქტომბერს გამოჩნდება და ის მაიკ ფლენაგანის The Haunting of Hill House-ის გაგრძელებაა.

The Haunting of Bly Manor-ის მოვლენები 1980-იანი წლების ინგლისში ვითარდება და მას საშინელებათა სახლის ყველა ატრიბუტი აქვს: აჩრდილჩასახლებული თოჯინები, ჟრუანტელის მომგვრელი კედლები, დიდებული არქიტექტურა და უცნაური ბავშვები.

იხილეთ ტრეილერი:

სერიალის მიმოხილვა Netflix-ზე ასეთია:

The Haunting of Hill House-ის შემქმნელი მაიკ ფლენაგანი და პროდიუსერი ტრევორ მეისი წარმოგიდგენთ The Haunting of Bly Manor-ს — მოჩვენებათა ანთოლოგიის მორიგ თავს, რომელსაც ფანები ძალიან ელოდნენ და რომლის მოვლენებიც 1980-იანი წლების ინგლისში განვითარდება. ოჯახში დამხმარე ქალის ტრაგიკული სიკვდილის შემდეგ ჰენრი ვინგრეივი (ჰენრი ტომასი) ახალგაზრდა ამერიკელ ძიძას (ვიქტორია პედრეტი) დაიქირავებს, რათა მის დაობლებულ დისშვილებს მოუაროს (ამელი ბეი სმიტი, ბენჯამინ ევან ეინსვორთი), რომლებიც ბლაი-მანორში შეფ-მზარეულ ოუენთან (რაჰულ კოლი), მებაღე ჯეიმისა (ამელია ივი) და დიასახლის მისის გროსთან (ტ'ნია მილერი) ერთად ცხოვრობენ. თუმცა ყველაფერი ისე არ არის, როგორც მანორში ჩანს, და სიყვარულისა და დანაკარგის საუკუნეების წინანდელი ბნელი საიდუმლოებანი მალე თავისი შემზარავი გოთიკური რომანტიკით გამოაშკარავდება. ბლაი-მანორში მკვდარი არ ნიშნავს წასულს.

The Haunting of Hill House-ის მსგავსად ეს სერიალიც ნაწილობრივ წიგნს ეფუძნება — ბლაი-მანორი ჰენრი ჯეიმსის The Turn of the Screw-ში გვხვდება. მიუხედავად ამისა, სტუდიის თქმით, სერიალი "ჰენრი ჯეიმსის ნამუშევრებს ეფუძნება", რაც ნიშნავს, რომ, შესაძლოა, ის ერთი ნაწარმოების ფარგლებს სცდებოდეს.