რუსეთის სამართალდამცავი ორგანოს მაღალჩინოსანმა გერმანიის ხელისუფლებას ნავალნის საქმესთან დაკავშირებით დახმარება სთხოვა. ამის შესახებ ინფორმაცია გამოცემა Deustche Welle-მ გაავრცელა.

მედიის ცნობით, გერმანიის იუსტიციის სამინისტრომ დაადასტურა ოფიციალური მოთხოვნა, რომლის თანახმადაც, რუსეთი ნავალნის ანალიზისა და წინასწარი დიაგნოზის გაგზავნას ითხოვს. გერმანელი ექიმების განცხადებით, ნავალნი კომაშია და მისი ეს მდგომარეობა შხამთან კონტაქტმა გამოიწვია.

რუსეთის ხელისუფლების ვარაუდით, წინასწარი გამოძიება ჯერ კიდევ არ ნიშნავს დანაშაულებრივი ქმედების მტკიცებულებას. გამოცემის ინფორმაციით, რუსული მედია წერს, რომ ნავალნის საქმეზე გამოძიება 20 სექტემბრამდე გაგრძელდება.

კორუფციასთან ბრძოლის ფონდის ხელმძღვანელი, ალექსეი ნავალნი ომსკის საავადმყოფოში, 20 აგვისტოს მოათავსეს. ნავალნი საავადმყოფოში მას შემდეგ მოხვდა, რაც ტომსკი-მოსკოვის რეისზე თავი შეუძლოდ იგრძნო. ავიალაინერში მასთან ერთად მყოფი პრესმდივნის თქმით, ის, მოწამლეს. იარმიში ასევე ამბობს, რომ დილით ნავალნიმ მხოლოდ ჩაი დალია.

თავდაპირველად ნავალნი ომსკის კლინიკაში მოათავსეს, სადაც თქვეს, რომ მის ორგანიზმში რაიმე საეჭვო ნივთიერება ვერ იპოვეს. 22 აგვისტოს ნავალნი სპეცთვითმფრინავით რუსეთიდან გერმანიაში გადაიყვანეს. ექიმებმა დაადასტურეს, რომ საქმე მოწამვლასთან ჰქონდათ.