"მორჩა მარტო ფულის კეთების დრო, უკვე აუცილებელია, ვიფიქროთ ბათუმის იერსახეზე და რაც დღეს დაგვრჩა, ის მაინც შევინარჩუნოთ", — განაცხადა პრემიერმინისტრმა, გიორგი გახარიამ. ამის შესახებ მან ბათუმის პორტში ქართული ოცნების წინასაარჩევნო პრეზენტაციაზე ისაუბრა.

გახარიას თქმით, საჭიროა ბათუმის განაშენიანების გეგმა. მისივე თქმით, წელს ტენდერი გამოცხადდება, 1 წელიწადში დასრულდება და ეს უნდა იყოს განუხრელი კანონი თითოეული მშენებლისთვის.

არასამთავრობო ორგანიზაციები და აქტივისტები, ისევე, როგორც მაცხოვრებლები წლებია აპროტესტებენ ბათუმის ქაოტური განაშენიანების გეგმას. მათი ნაწილი აცხადებს, რომ კომპანიები შეკრული არიან აჭარის მთავრობის თავმჯდომარესთან, თორნიკე რიჟვაძესთან, რასაც რიჟვაძე ოპოზიციის უსაფუძვლო ბრალდებებს უწოდებდა.