კომუნიკაციების კომისიამ ტელეკომპანია ფორმულას წინააღმდეგ საზოგადოებრივი მაუწყებლის საჩივარი არ დააკმაყოფილა. მათი განცხადებით, ფორმულას საზოგადოებრივი მაუწყებლის საავტორო და მომიჯნავე უფლებები არ დაურღვევია.

კომუნიკაციების კომისიაში განმარტავენ, რომ ფორმულამ საზოგადოებრივი მაუწყებლის ვიზუალური კომპონენტები საკუთარ ორიგინალურ კონტენტს, პაროდიის მიზნით დაადო და აღნიშნული ლოგოები მაუწყებლის გაშარჟებისთვის გამოიყენა. სწორედ ამას ამბობდა ფორმულა ბრალდებების პასუხად.

"საქმის მასალებიდან გამომდინარე, აშკარაა, რომ ფორმულას მიზანი იყო სატირულ-იუმორისტული გადაცემის განთავსება და მისი მოტივაცია არ ყოფილა საზოგადოებრივი მაუწყებლისა და ახალი დღის ლოგოების და ამავე გადაცემის ვიზუალური კომპონენტების საკუთარი მაუწყებლობის ან გადაცემის ამოსაცნობ ნიშნებად გამოყენება", — აცხადებენ კომისიაში.

საჩივრის მიზეზი გადაცემა ფსკერის მიერ საზოგადოებრივი მაუწყებლის შესახებ მომზადებული იუმორისტულ-სატირული სკეტჩია. კერძოდ, საზოგადოებრივი მაუწყებლის მიერ მომზადებული გადაცემის იმიტაცია, სადაც ასახული იყო ფულის წყალში გადაყრის ფინალი. ოთხი ადამიანი, რომლებსაც მაისურებზე აწერიათ საპენსიო ფონდი, ჯანდაცვის სამინისტრო, საქართველოს რკინიგზა და სპორტისა და კულტურის სამინისტრო, თბილისის ზღვაზე აწყობენ "საჩვენებელ ფულის ყრას". საზოგადოებრივი მაუწყებელი ამას მაყურებლის შეცდომაში შეყვანისკენ განზრახ მიმართულ ქმედებად მიიჩნევს.