რუსეთის პრეზიდენტის, ვლადიმერ პუტინის მტკიცებით, იგი ოპოზიციონერ ალექსეი ნავალნის საქმის ობიექტური გამოძიების მომხრეა. კრემლის პრესსამსახურის ინფორმაციით, ნავალნის საკითხზე პუტინმა იტალიის პრემიერმინისტრ ჯუზეპე კონტისთან ტელეფონით ისაუბრა.

"რუსულმა მხარემ ხაზი გაუსვა, რომ დაუშვებელია ნაადრევი და დაუსაბუთებელი ბრალდებები, ასევე, რომ ის დაინტერესებულია მომხდარის ყველა გარემოების დეტალურ და ობიექტურ გამოძიებაში", — ნათქვამია კრემლის ვებგვერდზე.

ალექსეი ნავალნის მოწამვლის საქმის გამოძიება მოითხოვეს გერმანიის კანცლერმა, ანგელა მერკელმა და ევროკავშირის უმაღლესმა წარმომადგენელმა, ჟოზეფ ბორელმა. აღნიშნულ განცხადებას აშშ-ს სახელმწიფო მდივანი, მაიკ პომპეოც შეუერთდა. გამოძიების მხარდაჭერის მზაობა გამოთქვა დიდი ბრიტანეთის პრემიერმინისტრმა, ბორის ჯონსონმა.

რუსეთის დუმის კომიტეტმა გამოძიება დაიწყო, თუმცა მათ გადაწყვიტეს, რომ ოპოზიციონერის მოწამვლაში საგარეო ჩარევა ეპოვათ.

კორუფციასთან ბრძოლის ფონდის ხელმძღვანელი, ალექსეი ნავალნი ომსკის საავადმყოფოში, 20 აგვისტოს მოათავსეს. ის ამ დრომდე უგონო მდგომარეობაში იმყოფება. ნავალნი საავადმყოფოში მას შემდეგ მოხვდა, რაც ტომსკი-მოსკოვის რეისზე თავი შეუძლოდ იგრძნო. ავიალაინერში მასთან ერთად მყოფი პრესმდივნის თქმით, ის, მოწამლეს. იარმიში ასევე ამბობს, რომ დილით ნავალნიმ მხოლოდ ჩაი დალია.

22 აგვისტოს ნავალნი სპეცთვითმფრინავით რუსეთიდან გერმანიაში გადაიყვანეს. ექიმებმა დაადასტურეს, რომ საქმე "შესაძლო" მოწამვლასთან იყო. დღემდე კლინიკის მახლობლად პოლიციის რამდენიმე ავტობუსი და 10-მდე სამართალდამცავი მორიგეობს, რომლებიც პერიმეტრზე 2-5 კაციანი ჯგუფით გადაადგილდებიან.