4 წლის გოგო, სახელად ჩარლი, TikTok-ზე ძალიან პოპულარული გახდა. მიზეზი კი ზეიმზე შესრულებული მისი "ცეკვაა", სადაც იგი თითის განძრევაზეც კი უარს ამბობს.

ვიდეოში, რომელიც დამსწრე აუდიტორიის ერთ-ერთმა წევრმა გადაიღო და შემდეგ TikTok-ზე განათავსა, სიმღერა სიმღერას ენაცვლება, ჩარლი კი პირბადესა და ბალეტის კაბაში გამოწყობილი უძრავად დგას თითქმის ექვსი წუთის განმავლობაში.

"ჩემი ძმისშვილის კონცერტზე წავედი და ამ ლეგენდის ცეკვას შევესწარი", — წერს ვიდეოს აღწერაში ქეილებ ქოლიე.

@chubbybeagle

Went to my niece’s outdoor dance recital and witnessed this legend. ##dancrecital ##legend

♬ original sound - chubbybeagle

ჩარლის დედა, ტიფანი ქოსბი, ამბობს, რომ მისი შვილის პოპულარობაზე არაფერი იცოდა, სანამ თანამშრომელმა არ უთხრა. ამასთან მან გულგრილად დასძინა, რომ ჩარლი ზუსტად ასე მოიქცა.

თუმცა, ჩარლიმ ბოლოს მაინც იცეკვა, როცა სცენის შუა და წინა ნაწილიდან გადაიყვანეს.

"ნამდვილად გაგვიკვირდა, როცა ბოლოს ცეკვა გადაწყვიტა. მგონი, ასე იმიტომ მოიქცა, რომ უკანა რიგში გადაიყვანეს", — ამბობს ქოსბი, — "ძალიან მკვირცხლი და თავისუფალი ბავშვია, თუკი მხოლოდ ნაცნობების ვიწრო წრეში უწევს ყოფნა. როცა ვკითხე, 'ჩარლი, რატომ არ იცეკვე დასაწყისში', განმიცხადა, ბევრი ხალხი იყოო".

ჩარლი დედასთან ერთად.

ფოტო: Tiffany Cosby

ქოლიეს ატვირთულ ვიდეოს 4,4 მილიონზე მეტი ნახვა აქვს და, როგორც ჩანს, ხალხსაც მოეწონა ჩარლის გადაწყვეტილება, არაფერი გაეკეთებინა სცენაზე და ისე მოქცეულიყო, თითქოს საერთოდ არ მონაწილეობდა ზეიმში.

მას შემდეგ, რაც ტიფანიმ შვილის ვარსკვლავობაზე შეიტყო, იგი ქოლიეს დაუკავშირდა და ასატვირთად ჩარლის კიდევ ერთი ვიდეო გაუგზავნა კონცერტიდან, სადაც პატარა მოცეკვავემ თმის გასასწორებლად ხელის განძრევა ინება.

@chubbybeagle

With permission from this icon’s mother, @cosbyt8 , here is the only movement recorded during her 6 minute performance ##dancrecital ##legend

♬ original sound - chubbybeagle

ტიფანის თქმით, საერთოდ არ გაჰკვირვებია, როცა მისმა შვილმა ქვა ააგდო და თავი შეუშვირა. რეპეტიციებზე მან რამდენჯერმე იცეკვა, თუმცა, როგორც დედამისი აღნიშნავს, "იგი ძალიან თავისებური ბავშვია".

დედის აზრით, ჩარლის პოპულარობა ალბათ იმან განაპირობა, რომ მისი ქცევა ზუსტად გამოხატავს 2020 წლის ხასიათს.

"ამ მხრივ ცოტათი ვგავართ მე და ჩარლი", — ამბობს ტიფანი, — "როგორც წესი, როცა ინტერნეტში რამე ახალი ქვეყნდება, ნეგატიურ კომენტარებს ელოდები. თუმცა, ჩემს ოჯახსაც იმას ვეუბნებოდი, როგორ გამიხარდა, როცა კომენტარების უმეტესობა დადებითი აღმოჩნდა.

"როცა გაიზრდება და მათ წაკითხვას შეძლებს, ეს მისთვის სასიამოვნო მოგონება იქნება და არა ცუდი", — დასძენს ტიფანი.