შინაგან საქმეთა სამინისტრო უარყოფს, რომ 11 წლის ბიჭზე ძალადობის შესახებ ინფორმაცია ჰქონდათ. უწყების განცხადებით, გარდაცვლილი ბიჭის ოჯახის არცერთ წევრზე შემაკავებელი ორდერი არ ჰქონდათ გაცემული — ასე ეხმაურება შსს მედიაში გავრცელებულ ინფორმაციას იმის შესახებ, რომ გარდაცვალებამდე ბიჭზე სისტემატიურად ძალადობდნენ და უწყებას რეაგირება არ ჰქონდა.

ამავდროულად, უწყებაში აცხადებენ, რომ 2010 და 2014 წლებში ბრალდებულ პირზე მიმართვა ფიქსირდება, რასაც მათი მხრიდან მოყვა "შესაბამისი რეაგირება", თუმცა "სამართლებრივი პასუხისმგებლობა არ დამდგარა".

"გარდა ამისა, 2014 წელს, ადგილი ჰქონდა ბრალდებულს და მის სიძეს შორის სიტყვიერ დაპირისპირებას, რაზეც პოლიციის მხრიდან გატარდა შესაბამისი ზომები", — აცხადებენ უწყებაში.

თერჯოლაში არასრულწლოვანის თვითმკვლელობამდე მიყვანის ბრალდებით მამა 24 აგვისტოს დააკავეს. უწყების განცხადებით, ბრალდებული 11 წლის შვილზე სისტემატურად ძალადობდა.