აფხაზეთის დე ფაქტო უშიშროების საბჭოს მდივნის, სერგეი შამბას განცხადებით, ოკუპირებული რეგიონის დე ფაქტო პრეზიდენტმა, ასლან ბჟანიამ იცოდა, რომ მისი თანაშემწე ლაშა საყანია პატრიოტთა ალიანსის ლიდერებს ხვდებოდა. აფხაზური მედიის, ნუჟნაია გაზეტას ინფორმაციით, ამის შესახებ შამბამ ომის ვეტერანების ორგანიზაცია არუაას წევრებთან შეხვედრაზე ისაუბრა.

შამბას ინფორმაციით, ამ საკითხთან დაკავშირებით ბჟანია დე ფაქტო პარლამენტის დეპუტატებს ზეგ, 27 აგვისტოს შეხვდება და განმარტებებს გააკეთებს. რაც შეეხება ორგანიზაცია არუაას, რომელმაც გაავრცელა ინფორმაცია საყანიას და ალიანსის ლიდერების შეხვედრის შესახებ, ისინი საყანიას თანამდებობიდან გათავისუფლებას ითხოვენ.

აფხაზეთის დე ფაქტო პრეზიდენტის წარმომადგენელმა, ლაშა საყანიამ თავიდან უარყო, შემდეგ კი დაადასტურა, რომ ოკუპირებულ რეგიონში პატრიოტთა ალიანსის ლიდერებს შეხვდა. მისი თქმით, აგვისტოს დასაწყისში მეგობრები დაუკავშირდნენ რუსეთის ფედერაციიდან, რომლებმაც სთხოვეს დახმარებოდა დავით თარხან-მოურავს, რომელსაც სურდა, ილორის ეკლესიისთვის ღვთისმშობლის ხატი გადაეცა. საყანიას თქმით, ამ თხოვნას "ჰუმანიტარული მიზნებით" დათანხმდა.

საყანიას განცხადების შემდეგ, შეხვედრა პატრიოტთა ალიანსის ლიდერმა, ირმა ინაშვილმაც დაადასტურა, რომელიც მანამდე ამ საკითხზე კომენტარს არ აკეთებდა. ინაშვილმა ოკუპირებულ აფხაზეთში ვიზიტისას გადაღებული ფოტოებიც გამოაქვეყნა. მისი თქმით, ფოტოები 18 აგვისტოს აფხაზეთში, ილორის ტაძარშია გადაღებული.