გრეის ანატომია მალე მე-17 სეზონით დაგვიბრუნდება და უკვე თავისუფლად შეიძლება იმის თქმა, რომ ის სერიალების ისტორიაში ერთ-ერთი ყველაზე ნახვადი და მაყურებელთა საყვარელი შოუა.

სერიალი ამ წარმატებას ვერ მიაღწევდა ელენ პომპეოს გარეშე, რომელიც მის 363 ეპიზოდში მონაწილეობს და ასევე 2 ეპიზოდის რეჟისორი და შოუს პროდიუსერია.

მიუხედავად ამისა, იყო რამდენიმე შემთხვევა, როდესაც ელენი დარწმუნებული არ იყო, სურდა თუ არა მერედით გრეის როლის შესრულების გაგრძელება.

დაქს შეპარდთან მის პოდკასტში, Armchair Expert-ში, საუბრისას ელენმა თქვა, თუ როგორ სხვადასხვაგვარად იმოქმედა მასზე სანდრა ოსა და პატრიკ დემპსის სერიალიდან წასვლამ.

ელენმა თქვა, რომ, როცა სანდრამ წასვლა გადაწყვიტა, ის არ იყო დარწმუნებული, თვითონაც შეეძლო თუ არა საერთოდ შოუს გაგრძელება. მას ახსოვს, როგორ ფიქრობდა: "სანდრას გარეშე როგორ გავაგრძელო? მის გარეშე საერთოდ არსებობს შოუ?".

მართალია, დერეკის როლის შემსრულებელი პატრიკი გრეის ანატომიის ერთ-ერთი საკვანძო ნაწილი იყო, მაგრამ ელენმა ეკრანზე "ყოველდღიურ სცენებში" სანდრასთან ბევრად მეტი დრო გაატარა, ამიტომაც კრისტინას გარეშე დარჩენილი მერედითი ელენისთვის უდიდესი დანაკარგი იყო.

მსახიობმა აღიარა, რომ მან "შესაძლებლობების აწონ-დაწონვა" სწორედ მე-10 სეზონში დაიწყო, რომელშიც კრისტინას ბოლო ეპიზოდები შედგა. ის ფიქრობდა, გრეის ანატომიაში დარჩენა მას სამუდამოდ მიაკრავდა თუ არა მერედითის იარლიყს და ნიშნავდა თუ არა ეს, რომ ის ვეღარასდროს იმუშავებდა სხვა როლზე.

ელენმა თქვა, რომ ის სანდრასგან განსხვავებულად გრძნობდა თავს, რადგან ამ დროს, მისი წარმოდგენით, სანდრას შეეძლო, კრისტინა იანგის როლისგან თავი დაეხსნა.

"სანდრა უფრო სხვანაირი მსახიობია... არასდროს შეგეპარება ეჭვი, რომ სანდრა ო ისევ იმუშავებს, არა? ის სამუდამოდ იმუშავებს, ხომ მართალია? მაგრამ ჩემს შემთხვევაში მომიწია, დავფიქრებულიყავი, მოვახერხებდი კიდევ მუშაობას თუ სამუდამოდ ამ როლში ჩარჩენა მომიწევდა?" — განმარტა ელენმა.

ამასობაში, როდესაც მე-11 სეზონის დროს პატრიკმა გადაწყვიტა წასვლა, ელენისთვის ეს აბსოლუტურად სხვანაირი გამოცდილება იყო. ამ დროს ის სხვა ხალხს — სტუდიასა და ქსელს — უმკლავდებოდა და ფიქრობდა, რომ შოუს "მთავარი კაცის" გარეშე მარტო ვერ გააგრძელებდა.

"შემეძლო, წავსულიყავი, რადგან პატრიკი წავიდა, თუმცა ეს ის ამბავი არაა, რომლის მოყოლაც მინდა. 'ის აქ აღარ არის, ამიტომ მეც უნდა წავიდე'. მერე ეს ამბავი ასეთ რამედ იქცევა: 'რა შემიძლია გავაკეთო მთავარი კაცის გარეშე?' — რადგან დიდი ხნის განმავლობაში მაგონებდნენ, რომ მის გარეშე არაფერი შემეძლო", — თქვა ელენმა.

მსახიობი ხშირად იხსენებდა: "ვინაა მართალი? ისინი? თუ მე? მის გარეშე მართლა მოვახერხებ რამეს?"

ცხადია, ელენმა გრეის ანატომიაში დარჩენა გადაწყვიტა. მისი თქმით, ამის ერთ-ერთი მიზეზი ის იყო, რომ მას სურდა, "დაემტკიცებინა [საკუთარი თავისთვის], რომ ისინი ცდებოდნენ იმ ყველაფერში, რაც წლების განმავლობაში მას ჩააგონეს".

კიდევ ერთი მიზეზი, რომელზეც ელენს აქამდეც უსაუბრია საჯაროდ, ის იყო, რომ მას სურდა, დაემტკიცებინა, რომ სცენის მიღმა არსებული ტოქსიკური სამუშაო გარემოს შეცვლა შეეძლო.

ამგვარად, ელენმა თავისი ახლად აღმოჩენილი ძალა იმისთვის გამოიყენა, რომ "შოუში ყოფნის გამოცდილების საკითხი შეეცვალა". "მინდოდა, მენახა, შეგვეძლო თუ არა გარშემო არსებული კულტურის შეცვლა და გადასაღები მოედნის ბედნიერ ადგილად ქცევა, რადგან ის ნამდვილად არასდროს ყოფილა ასეთი", — თქვა მსახიობმა.

საბოლოოდ, ელენმა თქვა, რომ მას უხარია, რომ სანდრასა და პატრიკის წავლის შემდეგ შოუში დარჩენა გადაწყვიტა, რადგან გრეის ანატომიის უკეთესობისკენ შეცვლა ისეთი რამაა, რითიც მსახიობი ძალიან ამაყობს.

ამავე თემაზე:

• როგორ ვიყოთ უფრო გავლენიანი: ელენ პომპეოს 5 რჩევა;
• ელენ პომპეოს სექსიზმითა და უთანასწორობით სავსე გზა $20 მილიონიან ჰონორარამდე;
• გრეის ანატომიის ახალ სეზონში კორონავირუსის პანდემიის ისტორიებს ვიხილავთ;
• Grey's Anatomy-ის გამოსვლიდან 15 წელი გავიდა — როგორ გამოიყურებიან მსახიობები ახლა.