გერმანულმა კლინიკამ დაადასტურა, რომ ალექსეი ნავალნი მოწამლული იყო. ინფორმაცია ამის შესახებ BBC-მ გაავრცელა.

DW-ის რედაქტორმა, რიჩარდ ვოლკერმა ტვიტერზე გამოაქვეყნა კლინიკა Charité-ს სამედიცინო დასკვნა, რომლითად დასტურდება, რომ რუსი ოპოზიციონერი მოწამლული იყო. ამავე ინფორმაციით, ის კომაში რჩება.

ნავალნის თანაგუნდელები აცხადებდნენ, რომ ოპოზიციონერის ორგანიზმში მომაკვდინებელი ნივთიერება აღმოაჩინეს, რომელიც საფრთხისშემცველია გარშემომყოფებისთვისაც. რუსეთში, ომსკის ჯანდაცვის უწყება კი ამტკიცებდა, რომ რუსი ოპოზიციონერის, ალექსეი ნავალნის ორგანიზმში არა საწამლავის, არამედ ალკოჰოლისა და კოფეინის კვალი იყო. სწორედ ომსკის საავადმყოფოდან გადაიყვანეს ნავალნი ბერლინში ოჯახის წევრების მოთხოვნით, ადგილობრივი ექიმების წინააღდეგობის მიუხედავად.

კორუფციასთან ბრძოლის ფონდის ხელმძღვანელი, ალექსეი ნავალნი ომსკის საავადმყოფოში, 20 აგვისტოს მოათავსეს. ის ამ დრომდე უგონო მდგომარეობაში იმყოფება. ნავალნი საავადმყოფოში მას შემდეგ მოხვდა, რაც ტომსკი-მოსკოვის რეისზე თავი შეუძლოდ იგრძნო. ავიალაინერში მასთან ერთად მყოფი პრესმდივნის თქმით, ის, მოწამლეს. იარმიში ასევე ამბობს, რომ დილით ნავალნიმ მხოლოდ ჩაი დალია.

ალექსეი ნავალნი ვლადიმერ პუტინის ყველაზე დიდი ოპოზიციონერია. პოლიტიკური აქტიურობის გამო ის მოსკოვში არაერთხელ დააკავეს და ადმინისტრაციული პატიმრობაც მიუსაჯეს. პირველ ჯერზე საპატიმრო დაწესებულებაში მან ათი დღე გაატარა. ადამიანის უფლებათა ევროპულმა სასამართლომ რუსეთს დაავალა, რომ ოპოზიციონერ ალექსეი ნავალნის 11-თვიანი შინაპატიმრობისთვის თითქმის 23 ათასი ლარი გადაუხადოს.