დღეს, 16 დეკემბერს, თბილისის საკრებულომ 2017 წლის თბილისის ბიუჯეტი 31 ხმით 7-ის წინააღმდეგ დაამტკიცა.

თბილისის 2017 წლის ბიუჯეტის მოცულობამ 801 302 000 ლარი შეადგინა.

თბილისის მერიის განცხადებით, ბიუჯეტის პროექტის დაზუსტებულ ვარიანტს ტრანსპორტის განვითარების მიმართულებით 2 მლნ ლარი დაემატა, რაზეც ჯამში პროექტების განხორციელებისთვის 64 მლნ ლარზე მეტი დაიხარჯება.

მერია აცხადებს, რომ ახალი ბიუჯეტის მიხედვით, საგზაო ინფრასტრუქტურის მშენებლობაში, აღდგენაში და მოვლა-შეკეთებისთვის წინა წელთან შედარებით, 6,8 მლნ ლარზე მეტს ანუ 85,5 მლნ-ს დახარჯავს.

განათლებისა და სკოლამდელი აღზრდის დაწესებულებების ხელშეწყობის ნაწილში მერია გეგმავს, რომ წინა წლის დამტკიცებულ ბიუჯეტთან შედარებით 15 მლნ ლარზე მეტი დახარჯოს, რაც მოიცავს იმას, რომ მათი განცხადებით, დაიწყება 8 ახალი ბაღის მშენებლობის პროცესი.

2017 წლის დაზუსტებულ ბიუჯეტში ბინათმშენებლობისა და ავარიული შენობების გამაგრებისთვის დამატებით 2 019 000 ლარი განისაზღვრა. მერია აცხადებს, რომ მათ შორის, გათვალისწინებულია კოოპერატიული ბინათმშენებლობის საკითხის მოგვარებისთვის შესაბამისი ღონისძიებების განხორციელება.

მერიის ბიუჯეტის პროექტში 1,9 მლნ ლარით გაზარდეს ქალაქის განვითარების ხელშეწყობის პროგრამა.

მერია აცხადებს, რომ ბიუჯეტით გათვალისწინებულია ისტორიულ-კულტურული ძეგლების და სხვა შენობების რეაბილიტაცია, მათ შორის ორბელიანის მოედნის რეაბილიტაცია, პუშკინის #19 და ყავლაშვილის #5-#7 შენობების სარეაბილიტაციო სამუშაოები, 7 სადარბაზოს რეაბილიტაცია, აღმაშენებლის გამზირზე ისტორიული ბაღების აღდგენა-რეკონსტრუქცია, ფიროსმანის ქუჩაზე სამი სახლისა და წინამძღვრიშვილზე #11 და #39 სახლების რეაბილიტაცია.

2017 წლის ბიუჯეტის ბიუჯეტია მხიედვით, სოციალურად დაუცველი ოჯახების მონაცემთა ერთიან ბაზაში რეგისტრირებულ იმ აბონენტებს, რომელთა ქულაც 70 000-დან 200 000-მდეა, აბონენტის ნომერზე 16 ლარის ნაცვლად, ჩაერიცხებათ არაუმეტეს 20 ლარისა მოხმარებული ელექტროენერგიის, წყლის და დასუფთავების გადასახადის ასანაზღაურებლად.

რაც შეეხება სტიქიის სალიკვიდაციო ღონისძიებებსა და დაზარალებული ოჯახების დაკმაყოფილებას, თბილისის მერია აცხადებს, რომ ამისათვის ბიუჯეტის დაზუსტებულ პროექტში დამატებით 2,3 მლნ ლარია განსაზღვრული.