რუსული მედია Moskovsky Komsomolets-ის ცნობით, რუს ოპოზიციონერ, ალექსეი ნავალნის, 20 აგვისტოს, თვითმფრინავში შეუძლოდ გახდომამდე, პოლიცია უთვალთვალებდა. რუსულ გამოცემას უსაფრთხოების სამსახურის თანამშრომელმა, რომელმაც ანონიმურად დარჩენა ამჯობინა, უთხრა, რომ რუსული სპეცსამსახურები ნავალნის სათვალთვალო კამერით ციმბირში გამგზავრების დროს ყურადღებით აკვირდებოდნენ.

ასევე, ანონიმური წყარო დეტალურად იტყობინება, თუ სად და ვისთან დარჩა ნავალნი და მისი გუნდი, ვის ელაპარაკეს და ისიც, თუ რა ჭამეს მივლინების დროს.

კორუფციასთან ბრძოლის ფონდის ხელმძღვანელი ახლა ბერლინში კლინიკა შარიტეში მკურნალობს. ნავალნის გერმანული პოლიცია 24 საათის განმავლობაში იცავს. ის გერმანულ კლინიკაში 22 აგვისტოს სპეცთვითმფრინავით რუსეთიდან გადაიყვანეს. ის მანამდე რუსეთის ქალაქ ომსკში მდებარე საავადმყოფოში მკურნალობდა, ოჯახის წევრები და თანაგუნდელები მის დაუყოვნებლივ გერმანიაში გადაყვანას მოითხოვდნენ, თუმცა რუსი ექიმები თავიდან ამის უფლებას, ნავალნის სტაბილურად მძიმე ჯანმრთელობის მდგომარეობის მოტივით, არ აძლევდნენ. ადგილზე ჩასულმა გერმანელმა ექიმებმა განაცხადეს, რომ ნავალნის ტრანსპორტირება დასაშვები იყო.

კრემლის გამოჩენილი კრიტიკოსის ცუდად გახდომას, მისი გუნდი და ოჯახის წევრები, რუსეთის ხელისუფლების მხრიდან მის მიზანმიმართულ მოწამვლას უკავშირებენ. ნავალნი, რომელიც რუსეთის პრეზიდენტის, ვლადიმერ პუტინის კრიტიკოსია, რუსეთის ხელისუფლების ყურადღების ცენტრში დიდი ხანია მოექცა. ის პუტინის საწინააღმდეგო, უნებართვო აქციების მოწყობისთვის მრავალჯერ დააკავეს.

2018 წელს, ადამიანის უფლებათა ევროპულმა სასამართლომ რუსეთი აიძულა, პოლიტიკურად მოტივირებული ზიანის მიყენების გამო, ნავალნისთვის 50 000 ევრო გადაეხადა.