აშშ-ში კონექტიკუტის შტატის ქალაქ დანბერის თანამდებობის პირებმა გადაწყვიტეს, კომიკოს ჯონ ოლივერს აჩვენონ, თუ რას ფიქრობენ ისინი ოლივერის მიერ მათი ქალაქის უხამსი დაცინვის შესახებ — ისინი საკანალიზაციო წყლების გამწმენდ ნაგებობას მის სახელს არქმევენ.

დანბერის მერმა მარკ ბაუტონმა ეს სარკასტული სვლა შაბათს, 22 აგვისტოს, თავის Facebook-ის გვერდზე დაპოსტილ ვიდეოში განაცხადა, რომელშიც ის ნაგებობასთან დგას.

"ვაპირებთ, მას [შენობას] სახელი შევუცვალოთ და ჯონ ოლივერის მემორიალური საკანალიზაციო ნაგებობა დავარქვათ. რატომ? იმიტომ, რომ ის განავლითაა სავსე, ისევე როგორც შენ, ჯონ", — თქვა მერმა.

ფოტო: Giphy

ახალი სახელი HBO-ს Last Week Tonight with John Oliver-ის ბოლოდროინდელ ეპიზოდს უკავშირდება, რომელშიც კომიკოსმა ნაფიც მსაჯულთა შერჩევის პროცესის რასობრივი უთანასწორობა განიხილა, რასთან დაკავშირებითაც კონექტიკუტის რამდენიმე ქალაქის პრობლემები მოიშველია.

ამ ნაწყვეტში ოლივერმა ახსენა დანბერის "მომხიბლავი რკინიგზის მუზეუმი" და მისი "ისტორიული ჰართსთოუნის ციხე-სიმაგრე".

"ზუსტად სამი რამ ვიცი დანბერის შესახებ. USA Today-მ ის 2015 წელს საცხოვრებლად მეორე საუკეთესო ქალაქად დაასახელად, ერთხელ ის ამერიკის ქუდების ინდუსტრიის ცენტრი იყო და, თუკი თქვენ ამ ქალაქიდან ხართ, მაშინ უვადო მოსაწვევი გაქვთ, რომ მოხვიდეთ — მათ შორის ბავშვები — და ჯონ ოლივერმა დაგჟეჟოთ. თქვენი (ცენზურა)", — თქვა კომიკოსმა გადაცემაში.

გაუგებარია, რის გამო გადაწყვიტა ოლივერმა დანბერის გალანძღვა. კვირას, 23 აგვისტოს, მის აგენტს კომენტარის გაკეთების მოთხოვნის შეტყობინება დაუტოვეს.

ოლივერმა 2017 წელს ერთხელ უკვე დასცინა ბაუტონსა და სხვა ამერიკელ მერებს იმ ვიდეოების გამო, რომლებშიც მერები ცდილობდნენ, ამაზონის მეორე შტაბ-ბინის აგების საუკეთესო ვარიანტად თავიანთი ქალაქი წარმოეჩინათ. თავის ვიდეოში ბაუტონი ალექსას — ამაზონის შექმნილ ხელოვნურ ინტელექტს — ეკითხება, რომელი ქალაქი იქნება დაწესებულებისთვის საუკეთესო ადგილი, ალექსა კი დანბერის პასუხობს.

ბაუტონი ახალ ვიდეოში იმასაც ამბობს, რომ ამაზონმა საწარმო დანბერიშიც გახსნა, თუმცა ეს მეორე შტაბ-ბინა არ არის.

"და, უი, ჰო, მადლობა იმ ამაზონის ვიდეოს ჩვენებისთვის. დანბერიში ამაზონის საწარმო გაიხსნა", — ეუბნება ბაუტონი ოლივერს ვიდეოს ბოლოში.

მარკ ბაუტონი საკანალიზაციო ნაგებობასთან

ფოტო: Office of Mayor Mark Boughton