რუსი ოპოზიციონერის, ალექსეი ნავალნის ორგანიზმში მომაკვდინებელი ნივთიერება აღმოაჩინეს, რომელიც საფრთხისშემცველია გარშემომყოფებისთვისაც. ამის შესახებ ნავალნის თანაგუნდელმა, კორუფციასთან ბრძოლის ფონდის დირექტორმა, ივან ჟდანოვმა განუცხადა ჟურნალისტებს.

ნივთიერებას გამოძიების ინტერესების მოტივით არ ასახელებენ. ჟდანოვის თქმით, ნავალნისთან კონტაქტში მყოფი ადმიანები სპეციალურად აღჭურვილ კოსტიუმებში უნდა იყვნენ.

ტელეკომპანია დოჟდი-ს ცნობით, ნივთიერების აღმოჩენის შესახებ ინფორმაცია იმ საავადმყოფოს მთავარ ექიმს, სადაც ამჟამად ნავალნი იმყოფება, სატრანსპორტო პოლიციის წარმომადგენელმა მიაწოდა.

ომსკის საავადმყოფოს ექიმები, ოჯახის წევრებისა და თანაგუნდელების დაჟინებული მოთხოვნის მიუხედავად, ნავალნის გერმანიაში სამკურნალოდ გადაყვანის უფლებას მისი სტაბილურად მძიმე მდგომარეობის მოტივით არ აძლევენ.

რუსი პოლიტიკოსის პრესმდივანი, კირა იარმიში აცხადებს, რომ ნავალნის გადაყვანაზე უარი ბოლოს წუთს მიიღეს, მანამდე მედიკოსები თანახმა იყვნენ ტრანსპორტირებისთვის საჭირო ყველა დოკუმენტები მოემზადებინათ.

კორუფციასთან ბრძოლის ფონდის ხელმძღვანელი, ალექსეი ნავალნი ომსკის საავადმყოფოში, გუშინ, 20 აგვისტოს მოათავსეს. ის ამ დრომდე უგონო მდგომარეობაში იმყოფება. ნავალნი საავადმყოფოში მას შემდეგ მოხვდა, რაც ტომსკი-მოსკოვის რეისზე თავი შეუძლოდ იგრძნო. ავიალაინერში მასთან ერთად მყოფი პრესმდივნის თქმით, ის, მოწამლეს. იარმიში ასევე ამბობს, რომ დილით ნავალნიმ მხოლოდ ჩაი დალია.

Deutsche Welle-მ დაწერა, რომ ნავალნის ჰოსპიტალიზაციის შემდეგ მის მხარდასაჭერად რუსეთში პიკეტირებები დაიწყო. გამოცემის ცნობით, ამის გამო რამდენიმე ადამიანი დააკავეს.

ალექსეი ნავალნი ვლადიმერ პუტინის ყველაზე დიდი ოპოზიციონერია. პოლიტიკური აქტიურობის გამო ის მოსკოვში არაერთხელ დააკავეს და ადმინისტრაციული პატიმრობაც მიუსაჯეს. პირველ ჯერზე საპატიმრო დაწესებულებაში მან ათი დღე გაატარა. ადამიანის უფლებათა ევროპულმა სასამართლომ რუსეთს დაავალა, რომ ოპოზიციონერ ალექსეი ნავალნის 11-თვიანი შინაპატიმრობისთვის თითქმის 23 ათასი ლარი გადაუხადოს.