გიორგი შაქარაშვილის საქმის პროკურორის განცხადებით, ერთ-ერთი მოწმის გურამ ამირხანაშვილის ჩვენების გავრცელებას სამართლებრივი შეფასება მიეცემა. მისივე თქმით, აღნიშნული ჩვენება საქმის მასალებთან და გარემოებებთან წინააღმდეგობაში არ მოდის.

"გამოძიების ეტაპზე ჩვენი მიზანია, ის მოწმეები, რომლებიც მომავალში დაიკითხებიან, მათ არ იცოდნენ გამოძიების ვერსიები თუ საქმეში არსებული ჩვენებები. ეს ხელს უშლის გამოძიებას, რადგან ეს პირები მოდიან შემდეგ მომზადებული პოზიციებით და ასე შემდეგ. ჩვენი მიზანიც ეს იყო და ადვოკატების გაფრთხილებაც ამას ემსახურებოდა", — განაცხადა პროკურორმა.

ერთ-ერთი არასრულწლოვანი ბრალდებულის ზ.ხ-ს ადვოკატის, გიორგი გელხაურის თქმით, ამირხანაშვილის აღნიშნული ჩვენება აბსურდია და რეალობასთან მას კავშირი არა აქვს.

"ვის სჯერა ამ სიბრიყვის? დარწმუნებული ვარ ადეკვატურობასთან პრეტენზია ვერ ექნება იმ პირს, ვის თავშიც ეს მოიხარშა. ეს არის ნათელი მაგალითი, თუ როგორ ებრძვის სახელმწიფო, ამ შემთხვევაში საგამოძიებო ორგანოები კონკრეტულ სისხლის სამართლის საქმეზე ბრალდებულად ცნობილ პირებს, როგორ ახდენს ის ზეწოლას მოწმეებზე და როგორ ანადგურებს საქმეში არსებულ ნივთმტკიცებებსა და მტკიცებულებებს", — აცხადებს გელხაური.

ამირხანაშვილის გამოკითხვის ოქმი 19 აგვისტოს რადიო თავისუფლებამ გაავრცელა. გამოცემის ვარაუდით, სწორეს ეს ინფორმაცია გახდა მიზეზი, რა მოტივითაც დაკავებული 17 პირიდან 5-ს ბრალი დამამძიმებელ გარემოებებში განზრახ მკვლელობის მუხლი წაუყენეს.