თამარ ბაჩალიაშვილის ოჯახის წევრები და ადვოკატი დღეს, გენერალურ პროკურორ ირაკლი შოთაძეს კიდევ ერთხელ შეხვდნენ, როგორც ადვოკატი რამიშვილი ამბობს, საქმეში თვის ბოლოდან ჩაერთვებიან უცხოელი ექსპერტები.

"ჩემ მიერ გასაჯაროებულმა ვიდეომ ეჭვები დაბადა მთავარ პროკურორსა და მის მოადგილეებში და ამან შექმნა ისეთი პირობა, რომ სატელიტური სურათებიც გამოითხოვონ და დაადგინონ 18, 19, 20, 21, 22 ივლისს იყო თუ არა ავტომობილი ადგილზე. დავსვი კითხვა, რამდენად სანდო იყო ის აზრი, რომ 5 დღე ავტომობილი იქ იდგებოდა, იმიტომ, რომ ჩვენ გვქონდა დეტალურად საუბარი, რომ ჩემში არათუ ეჭვს ბადებდა, დარწმუნებული ვიყავი, რომ 5 დღე ავტომობილი იქ ვერ იქნებოდა და მათთვისაც ეს დიდ ეჭვს აჩენს.

თვის ბოლოს უცხოელი სპეციალისტები იქნებიან მოწვეულები. ძალიან კარგი სპეციალისტები არიან, რომლებიც გაეცნობიან დასკვნებს და ჩართულები იქნებიან. ამავდროულად იქნება კომპლექსური კომისიური ექპერტიზა, რომელსაც მე ემპათიასთან ერთად ვატარებ. ამაზეცაა უკვე გადაწყვეტილება მიღებული", — განაცხადა რამიშვილმა.

23 წლის პროგრამისტი, თამარ ბაჩალიაშვილი 18 ივლისს დაიკარგა. ოჯახის წევრების განცხადებით, ის საკუთარი მანქანით ქვემო ფონიჭალიდან გავიდა და აღარ დაბრუნებულა. დაკარგვიდან 5 დღის შემდეგ, ბაჩალიაშვილი საკუთარ მანქანაში გარდაცვლილი იპოვეს. მანქანა თეთრიწყაროს მუნიციპალიტეტში, მაგისტრალიდან 100-200-მდე მეტრის დაშორებით, ბუჩქნარში იყო გაჩერებული. ოჯახის ადვოკატის, მიხეილ რამიშვილის თქმით, ცხედარი უკანა სავარძელზე იყო და ქალი რამდენიმე დღის გარდაცვლილია.

საქმეზე გამოძიება თავისუფლების უკანონო აღკვეთის მუხლით მიმდინარეობდა. 24 ივლისს საქმეს კიდევ ერთი კვალიფიკაცია თვითმკვლელობამდე მიყვანის მუხლი დაემატა.

ჯერ კიდევ ძებნის პროცესში გამოძიებამ ამოიღო ბაჩალიაშვილის კომპიუტერი, თუმცა ოჯახი აცხადებდა, რომ მისი გახსნა ვერ შეძლეს. მოგვიანებით კი მამამ მედიასთან თქვა, რომ პოლიციელის თქმით, მისი შვილი "დიდ შარში იყო". ოჯახის ადვოკატი კომპიუტერის გახსნის პროცესზე დასწრებას ითხოვდა, თუმცა, მიხეილ რამიშვილის განცხადებით, ლუქი მის გარეშე მოხსნეს.