ინგლისელ რეჟისორ რიდლი სკოტს კინომოყვარულები იცნობენ ისეთი გახმაურებული ფილმებით, როგორებიცაა გლადიატორი, უცხო და მარსელი, მალე კი მის მიერ გადაღებული სერიალის შეფასებაც შეგვეძლება.

Raised by Wolves — ასე ჰქვია ახალ სატელევიზიო შოუს, რომელიც ბოლო დროს განსაკუთრებით გააქტუალურებული სამეცნიერო ფანტასტიკის ჟანრის საშუალებით კაცობრიობის მომავალზე მოგვითხრობს: დედამიწაზე მომხდარი დამანგრეველი ომის გამო პლანეტა საცხოვრებლად გამოუსადეგარი გახდა, რის გამოც ადამიანები სიცოცხლის გაგრძელებას სხვა გარემოში ცდილობენ.

სერიალის სიუჟეტიც ერთ მისტიკურ პლანეტაზე ვითარდება, სადაც ორ ანდროდს ევალება, რომ ბავშვები გაზარდონ და საფრთხისგან დაიცვან. თუმცა საიდან მოდის მთავარი საფრთხე და ვინ არის საშიში მგელი, რომელიც ანდროიდის მიერ მოთხრობილი იგავური შინაარსის სამი გოჭის ისტორიაში ჩნდება, მთავარი გამოცანა იქნება.

სერიალი სულ ათეპიზოდიანი იქნება და რიდლი სკოტი პირველი ორი ეპიზოდის რეჟისორია. შოუს მთავარი შემოქმედი აარონ გუზიკოვსკია, რომელსაც აქამდე ისეთი პროექტების სცენარზე უმუშავია, როგორებიცაა დენის ვილნევის Prisoners და მაიკლ ნოერის Papillon.

სერიალი სტრიმინგ სერვის HBO Max-ს ეკუთვნის, რომელიც მაისში გამოჩნდა ბაზარზე და მაყურებლებს ისეთი დამაინტრიგებელი პროექტებით იზიდავს, როგორებიცაა Friends-ის ეკრანებზე დაბრუნება და სეთ როგენის დამაინტრიგებელი კომედია.

Raised By Wolves-ის პრემიერა 3 სექტემბერს შედგება და ჩვენც სწორედ მაშინ შეგვეძლება შეფასება, თუ რამდენად წარმატებული გამოდგა რიდლი სკოტის სატელევიზიო დებიუტი.