მას შემდეგ, რაც დისნეის ახალი მაღალი მოლოდინების მქონე პროექტის — მულანის პრემიერა პანდემიის გამო არაერთხელ გადაიდო, მაყურებლებს საბოლოოდ შესაძლებლობა ექნებათ, რომ სულ მალე ის იხილონ.

თუმცა დიდი ეკრანის ნაცვლად, მისი პრემიერა მცირე ეკრანებზე შედგება.

CNN-ის ცნობით, გიგანტურმა კომპანია დისნეიმ გადაწყვიტა, რომ 1998 წელს გამოსული საკულტო ანიმაციის ამ ახალი რიმეიქის პრემიერა კინოთეატრების ნაცვლად თავის სტრიმინგ სერვისზე — Disney Plus-ზე შედგეს.

დისნეის აღმასრულებელი ხელმძღვანელის, ბობ ჩაპეკის განცხადებით, ამ "ახალი საშუალებების" გამოყენება მათ პანდემიამ აიძულა.

"ვიფიქრეთ, რომ მნიშვნელოვანი იყო ალტერნატიული გზები გვეპოვა, რომელთა საშუალებითაც ამ განსაკუთრებულად ოჯახური განწყობის მქონე ფილმის ხილვის საშუალებას მაყურებლებს რაც შეიძლება მალე მივცემდით".

ეს "ალტერნატიული გზა" $29.99 ღირს: Disney Plus-ზე 4 სექტემბერს გაიმართება მულანის პრემიერა და ამ სტრიმინგ სერვისის მომხმარებლებს ექსკლუზიურად შეეძლებათ მისი ნახვა.

ფოტო: Disney

როგორც ბობ ჩაპეკი ამბობს, ეს მხოლოდ "ერთი გამონაკლისი" იქნება და სხვა დაგეგმილი პროექტების პრემიერებს მსგავსი ფორმატით არ გამართავენ. ყოველ შემთხვევაში, ჯერ მაინც არა:

"ამ გზით გავიგებთ, თუ რამდენად საინტერესო, ხელმისაწვდომი და კომფორტულია ჩვენი მომხმარებლებისთვის ეს მეთოდი".

Disney+ სულ რაღაც ცხრა თვის წინ ამოქმედდა და გასული თვის მონაცემებით უკვე 60,5 მილიონი მომხმარებელი ჰყავს, შესაბამისად, ამ პლატფორმაზე მულანის პრემიერა, დიდი ალბათობით, "ანშლაგით ჩაივლის".

რაც შეეხება იმ ქვეყნებს, სადაც ამჟამად დისნეის ეს სერვისი ხელმისაწვდომი არ არის (მათ შორისაა საქართველოც), ფილმის პრემიერა უახლოეს შესაძლებელ დროს ტრადიციული გზით — კინოთეატრებში შედგება.

ისღა დაგვრჩენია, ფილმის ტრეილერი კიდევ ერთხელ ვნახოთ და დაველოდოთ, როდის შევძლებთ მულანის ახლებური ისტორიის ხილვას ეკრანებზე.