ეკონომიკის მინისტრის, ნათია თურნავას განცხადებით, ბოლო დროს საქართველოში განხორციელებული ფრენების შედეგად ჩამოსულ მგზავრთა უმრავლესობა, 3/4 საერთაშორისო ტურისტია.

"მე, როგოროც ეკონომიკის მინისტრს, არ შემიძლია, სიხარულით არ აღვნიშნო, რომ ქუჩებში გამოჩნდა უკვე პირველი უცხოელი ტურისტები და მაგალითად, ის რეისები, რაც ჩამოფრინდა პარიზიდან, მიუნხენიდან, მგზავრთა უმრავლესობა, 3/4 არის უცხოელი ტურისტი. აქედან გამომდინარე, ქუჩებში უკვე შევძლებთ კვლავ მონატრებული უცხოელი ტურისტები დავინახოთ", — განაცხადა თურნავამ მთავრობის ადმინისტრაციაში გამართული საკოორდინაციო საბჭოს შემდეგ.

მისივე თქმით, ფრენების აღდგენის მიზნით, ეტაპობრივად, სხვადასხვა კომპანიასთან მოლაპარაკებები მიმდინარეობს.

"ჩვენ აგვისტოს თვეში რეგულარული ფრენები ნაწილობრივ გავხსენით. დაფრინავს Lufthansa. Air France-ის პირველი რეისი 9 აგვისტოს ჩამოფრინდება. ხვალ ჩვენთან იქნება პირველი რეისი რიგა-თბილისი-რიგა. გარდა ამისა, Airzena ასრულებს კომერციულ ჩარტერებს და 16-მდე კომერციული ჩარტერი არის დაგეგმილი თვის განმავლობაში. ჩვენ ვაგრძელებთ მოლაპარაკებას სხვა კომპანიებთან და ეტაპობრივად გავხსნით სხვა ფრენებსაც, რა თქმა უნდა, ეპიდემიოლოგიური ვითარების გათვალისწინებით", — აღნიშნა ეკონომიკის მინისტრმა.

8 ივლისს პრემიერმინისტრის პრესსპიკერმა ირაკლი ჩიქოვანმა განცხადება გააკეთა, სადაც აღნიშნა, რომ საქართველომ ევროკავშირის წევრ 5 ქვეყანას საზღვრები უპირობოდ გაუხსნა. ირაკლი ჩიქოვანის განცხადებით ეს ქვეყნებია: გერმანია, საფრანგეთი, ლიეტუვა, ლატვია და ესტონეთი.