ბერლინის შემდეგ, ქურდბაცაცა მელაკუდას თბილისშიც წაასწრეს და "დაატუსაღეს"

გახსოვთ გერმანელი მელა, რომელიც ბერლინელებს ფეხსაცმელებს ჰპარავდა და მის სამალავს სულ ცოტა ხნის წინ მიაგნეს? როგორც ირკვევა, მელაკუდების კრიმინალური ბანდის წარმომადგენელი თბილისშიც გვყავს, თან არც მეტი, არც ნაკლები — შუაგულ ვაკეში.

როგორც ცხოველთა მონიტორინგის სამსახურის უფროსი, ვახტანგ ლომჯარია ფეისბუქზე წერს, რამდენიმე კვირის განმავლობაში თბილისის სამეზობლოს ქურდი შეეჩვია, რომელიც ასევე ტანსაცმელს იპარავდა:

"ხან ცალი ჩუსტი იკარგებოდა, ხან ბოტასი. კონკრეტული ოჯახის შევიწროებას არ დასჯერდა, მეზობლების რეკეტზეც გადავიდა და გასაშრობად გაფენილი ორი პერანგიც გაიყოლა".

მელას ფაქტზე წაასწრეს და დააპატიმრეს, თუმცა, როგორც ჩანს, ადგილობრივი თანამზრახველი ჰყოლია. როგორც მონიტორინგის სამსახურის უფროსი იტყობინება, კრიმინალისკენ მიდრეკილ ცხოველს დღეს გაათავისუფლებენ და ბუნებაში დააბრუნებენ.