გიგი უგულავა ზუგდიდში მაჟორიტარად იყრის კენჭს. ამის შესახებ მან პარტიის მიერ მაჟორიტარი კანდიდატების წარდგენის დროს განაცხადა.

"ზუგდიდში იქნება ყველაზე მთავარი ბრძოლა, რომელსაც ივანიშვილი გამართავს თავისი დამპალი ხელისუფლების შესანარჩუნებლად. ზუგდიდი არ იმსახურებს იმ აღვირახსნილ კორუფციას. ზუგდიდი არის სიმბოლო ჩვენი დამოუკიდებლობის სიმბოლო და სწორედ ამიტომ მივიღე გადაწყვეტილება, ზუგდიდში, ზუგდიდელებთან ერთად დავამარცხო ივანიშვილის რეჟიმი", — თქვა მან.

უგულავამ მხარდაჭერა სთხოვა კოლეგა პარტიებს, თუმცა აღნიშნა, რომ ამავდროულად, მზადაა პატიოსანი კონკურენციისთვის, რადგან მიაჩნია, რომ "ზუგდიდი არ არის მეორეხარისხოვანი, კაცის კაცების შეჯიბრი, ან პარტიული ნომრების შეჯიბრის ასპარეზი".

"მე ვარ მზად კონკურენციისთვის, მაგრამ ჩემი კონკურენტი არ იქნება, არცერთი ოპოზიციური პარტიის წარმომადგენელი, ჩემი კონკურენტი არ იქნება ბედკრული ირაკლი ჩიქოვანი, ჩვენი კონკურენტი იქნება მხოლოდ ივანიშვილი", — თქვა უგულავამ.

ევროპულმა საქართველომ დღეს რეგიონებში მაჟორიტარობის სულ 14 კანდიდატი წარადგინა.