აშშ-ს ელჩი საქართველოში კელი დეგნანი აცხადებს, რომ ქუთაისის განახლებული აეროპორტი თვალსაჩინო იქნება და მის გახსნას მოუთმენლად ელიან. დღეს, 30 ივლისს ელჩი ეკონომიკის მინისტრ ნათია თურნავასთან ერთად აეროპორტს ეწვია და მიმდინარე სამუშაოები დაათვალიერა.

"შეერთებული შტატები მოხარულია, მხარი დაუჭიროს საქართველოს მთავრობასა და საქართველოს აეროპორტების გაერთიანებას ქუთაისის საერთაშორისო აეროპორტის გაფართოების საქმეში, სადაც ამჟამად ახალი ინფრასტრუქტურის მშენებლობა მიმდინარეობს", — აღნიშნა დეგნანმა.

როგორც ამერიკის ელჩმა თქვა, მნიშვნელოვანია, რომ ახალი ინფრასტრუქტურის მოწყობისა და მშენებლობის დასრულების შემდეგ განახლებული აეროპორტი საათში 1 200 მგზავრის შეუფერხებლად გატარებას შეძლებს. კელი დეგნანის განცხადებით, ასევე მნიშვნელოვანია, რომ ქუთაისის აეროპორტი ევროპაში უსაფრთხო აეროპორტიც იქნება, ვინაიდან იქ COVID-19-თან დაკავშირებული ყველა რეგულაციაა დანერგილი.

"დიზაინი არაჩვეულებრივია და აეროპორტი ულამაზესი იქნება. ეს პროექტი მნიშვნელოვანი საქართველოსთვის და შეერთებული შტატები მას მხარს დაუჭერს, რათა აეროპორტში გაიზარდოს იმ მაღალანაზღაურებად დასაქმებულთა რიცხვი, რომლებიც აუცილებელია აეროპორტის უმაღლეს დონეზე ფუნქციონირებისთვის. [...] ეს იქნება მართლაც თვალსაჩინო აეროპორტი და მოუთმენლად ველით განახლებული ქუთაისის აეროპორტის გახსნას", — აღნიშნა ელჩმა.

ქუთაისის აეროპორტის ახალი და ძველი ტერმინალების მოწყობისთვის 11,6-მილიონიანი ტენდერი გამოცხადდა. როგორც შემდგომში აეროპორტების გაერთიანებაში განაცხადეს, ტერმინალების განახლება კორონავირუსის პანდემიის გამო შეჩერდა.