ცოტა ხნის წინ Facebook-ზე სერიალების ჯგუფში წელს უკვე არაერთგზის და არაერთი ფორმით დასმული შეკითხვა კვლავ გაჟღერდა: 2020 წელი რომ სერიალის პერსონაჟი იყოს, ვინ იქნებოდა?

ღმერთი წელს დისტოპიას წერს, მაგრამ 2020 უკვე ჟანრის მოყვარულებსაც კი ძალიან მობეზრდათ. საბედნიეროდ, ადამიანებს ჩვენთვის საძულველი რამეების ერთმანეთთან შედარებაზე მეტად ცოტა რამ გვიყვარს, ამიტომ, მოდი, რამდენიმე ისეთი პერსონაჟი გავიხსენოთ, რომლებიც ჭეშმარიტად გვეზიზღებიან, თავს გვაბეზრებენ ან, უბრალოდ, საშინელი ადამიანები არიან:

1. მისტერ ბიგი Sex and the City-დან

ფოტო: HBO

გულისამრევი კაცის კლასიკური მაგალითი. პრინციპში, ქერიც შეიძლებოდა მის ადგილას, ორივე ერთად კი სამუდამო კარანტინშია გასაშვები.

2. ემილი Friends-იდან

ფოტო: Warner Bros.

თავიდან კი ყველას გვესაყვარლება, მაგრამ მალევე აჩენს კლანჭებს და ყველაზე ეჭვიანი, კონტროლის მოყვარული და ეგოისტი პერსონაჟი ხდება.

3. მარტინი Fleabag-იდან

ფოტო: BBC

რამდენად უხერხემლო, გამაღიზიანებელი და საზიზღარია მარტინი? 20/20.

4. ფრენკი Shameless-იდან

ფოტო: Showtime

საშინელი მამა, მოქალაქე და ადამიანი. არასდროს იცი, რას გიმზადებს და ზურგში დანას როდის ჩაგცემს. Sounds familiar?

5. ჰანა Dark-იდან

ფოტო: Netflix

არაა გამორიცხული, სადმე 1987-ში იყოს გადასული და მის გამო ვიყოთ ახლა ამ დღეში.

6. ნიკი და პაულო Lost-იდან

ფოტო: ABC

სრულიად არასაჭირო და ერთმანეთზე საშინელი პერსონაჟები, რომლებმაც ჩვენი საყვარელი სერიალის მთელი სერია წაგვართვეს, 2020-მა კი — ჩვენი ცხოვრების მთელი წელი.

7. არტურო Money Heist-იდან

ფოტო: Netflix

კორონავირუსს რომ სახე ჰქონდეს, ნამდვილად არტურიტოსი იქნებოდა.

8. ნიგანი The Walking Dead-იდან

ფოტო: AMC

დაუნდობელი და გარყვნილი ნარცისი, რომელსაც დიდი სიამოვნებით ვაფეთებდით სახეში მისსავე "ლუსილს".

9. ჯოფრი, რემზი და ოლი Game of Thrones-იდან

ფოტო: HBO

ამ სამიდან რომელიმეს გამორჩევა 2020-ის გადაგორებაზე უფრო რთული საქმეა. საბედნიეროდ, სამივემ საკადრისად დაასრულა სიცოცხლე.

10. მარნი Girls-იდან

ფოტო: HBO

განდიდების მანიით მოცული ეგოისტი და ზედაპირული ადამიანი, რომელსაც ჰგონია, რომ ყველა მას უნდა ევლებოდეს თავს. She's just the worst.

11. თი-ბეგი Prison Break-იდან

ფოტო: Fox

ყოვლად ურცხვი და ამორალური, ბოროტების ნამდვილი განსხეულება. რკინის პირბადე აკლია და ჰანიბალ ლექტერობასაც თავისუფლად გაწვდება.

12. გევინი Silicon Valley-დან

ფოტო: HBO

ასეთი არაეთიკური და უმოწყალო ნაძირალა ცოტა თუ მოიძებნება. 2020 წელი რომ მსახიობი იყოს, იდეალურად მოირგებდა მის როლს.

13. ენდი The Office-იდან

ფოტო: NBC

ყოველმხრივ უჭკუო და უზნეო პერსონაჟი, რომელიც მაიკლის ჩანაცვლების შემდეგ კიდევ უფრო აუტანელი ხდება. თავისუფლად შეიძლება, წლევანდელი მეკვლე ის იყოს.

14. სერენა The Handmaid’s Tale-იდან

ფოტო: Hulu

რთულია ისეთი მომენტების გახსენება, როდესაც სერენა სრული ურჩხული არ არის. ყოველგვარი სინანულის არარსებობს რომ თავი დავანებოთ, უზნეოდ პატრიარქალური საზოგადოებას ჩამოყალიბებაში მასაც დიდი წვლილი მიუძღვის.

15. დოლორეს ამბრიჯი ჰარი პოტერიდან

ფოტო: Warner Bros.

კი, მართალია, მხოლოდ სერიალის პერსონაჟები უნდა ყოფილიყვნენ ამ სიაში, მაგრამ ახლახან გამოცემული დეკრეტი №2020-ის მიხედვით, დოლორეს ამბრიჯისადმი ზიზღი ყველანაირი ჟანრისა და ფორმატის ფარგლებს სცდება.

ბონუსი: ჩენდლერი Friends-იდან

ფოტო: Warner Bros.

დამშვიდდით, დამშვიდდით, ეს ხუმრობაა. ჩენდლერს თითი არავინ დააკაროს!

ფოტო: Warner Bros.