ქართული ოცნების ინფორმაციით, მათმა ლიდერმა, ბიძინა ივანიშვილმა ეროვნულ-დემოკრატიული ინსტიტუტის (NDI) პრეზიდენტ დერეკ მიტჩელთან და ორგანიზაციის წარმომადგენლებთან ონლაინ შეხვედრა გამართა.

პარტიის ფეისბუქგვერდზე გამოქვეყნებული განცხადების მიხედვით, შეხვედრაზე 2020 საპარლამენტო არჩევნების წინასაარჩევნო გარემოზე ისაუბრეს.

"შეხვედრას ესწრებოდნენ NDI-ის წამყვანი ექსპერტი და საარჩევნო პროგრამის დირექტორი პატრიკ მერლო, NDI-ის ევრაზიის პროგრამების დირექტორი ლორა ჯუიტი, NDI-ის ყირგიზეთის ოფისის დირექტორი ალან გილამი და NDI საქართველოს პროგრამის უფროსი მენეჯერი და მრჩეველი გენდერულ საკითხებში თეონა ყუფუნია" — ნათქვანია "ოცნების" განცხადებაში.

2019 წელს ბიძინა ივანიშვილმა საქართველოში ჩატარებული პოლიტიკური კვლევების გამო უკმაყოფილება გამოთქვა და საერთაშორისო ორგანიზაციები NDI და IRI გააკრიტიკა. ივანიშვილმა განაცხადა, რომ მათ შესახებ კონგრესის, სენატისა და აშშ-ს პრეზიდენტის ადმინისტრაციის ინფორმირებისთვის ღია წერილის გამოქვეყნებას გეგმავდა.

"იმდენად უნდოა ეს კვლევები, რომ შეიძლება ამაზეც მიდის მუშაობა, რომ აი, ამერიკული ორგანიზაციები ამას შეგნებულად ამახინჯებენ, რომ აჩვენონ, რომ მხარს უჭერენ ნაციონალურ მოძრაობას", — ამბობდა ივანიშვილი NDI-სა და IRI-ის კვლევებზე.

ამის შემდეგ კვლევების სანდოობა კითხვის ნიშნის ქვეშ არაერთხელ დააყენეს მმართველი გუნდის წევრებმა.