8 ივლისს სან დიეგოს ზოოპარკში კატისებრი ლემურის წარმომადგენელმა, სახელად როზალიტამ ტყუპი ნაშიერები გააჩინა და კალიფორნიის შტატში მდებარე ეს ზოოპარკი უახლესი კადრებით ცხოველების მოყვარულებს საშუალებას აძლევს პატარა ლემურები გაიცნონ.

"როგორც კი ტყუპები გაჩნდნენ, დარწმუნებულები ვიყავით, რომ როზალიტა შესანიშნავი დედა იქნებოდა. მან მაშინვე გამოამჟღავნა დედა ლემურისთვის დამახასიათებელი ყველა ქცევა: ძალიან მზრუნველი იყო, ნაშიერებს ბეწვი აულოკა, საჭირო ადგილას მოათავსა და მათ ძალიან ნაზად ექცევა", — განაცხადა სან დიეგოს ზოოპარკის სპეციალისტმა, იელენი სმიტმა.

დედა ლემური ერთადერთი არაა, ვინც ახალშობილებზე ზრუნავს: ტყუპი ლემურები ზოოპარკის თანამშრომლების განსაკუთრებული მეთვალყურეობის ქვეშ არიან და როგორც დეტალური სამედიცინო შემოწმების შემდეგ გაირკვა, ისინი სრულიად ჯანმრთელები არიან.

ახალდაბადებულებიდან ერთი მამრია, მეორე კი — მდედრი. მათთვის სახელები ჯერ არ შეურჩევიათ, თუმცა მათი შეყვარება უკვე ბევრმა მოახერხა.

"მათი დაბადება ძალიან მნიშვნელოვანია, რადგან ეს შესაძლებლობას გვაძლევს, გადაშენების პირას მყოფი ლემურის სახეობის შესახებ უფრო მეტი გავიგოთ და ეს ცოდნა ყველას გავუზიაროთ", — ამბობს იელინი სმიტი.

ამჟამად პატარა ლემურები დროის დიდ ნაწილს დედის მუცელზე ჩაბღაუჭებულები ატარებენ და მზეს ეფიცხებიან. როცა წამოიზრდებიან, უკვე დედის ზურგზე გადაინაცვლებენ, ოთხი თვიდან კი დამოუკიდებლად დაიწყებენ გადაადგილებას.

ველურ ბუნებაში კატისებრი ლემურები მხოლოდ მადაგასკარის კუნძულზე გვხვდებიან და ამჟამად ეს სახეობა გადაშენების პირასაა. სან დიეგოს ზოოპარკი მადაგასკარის ცხოველთა დაცვის ადგილობრივ ორგაზაციას კონსერვაციის პროგრამის ფარგლებში ეხმარება, რათა სახეობის შენარჩუნება შეძლონ.