წალენჯიხის საკრებულოს თავმჯდომარე, თემურ ღვინჯილია კონტრაბანდის ბრალდებით არის დაკავებული. ამის შესახებ ინფორმაციას On.ge-სთან ადასტურებს წალენჯიხის მერი, ბესიკ ფარცვანია. იგი ამბობს, რომ დეტალებზე ინფორმაცია ჯერჯერობით არ აქვს.

ფინანსთა სამინისტროს საგამოძიებო სამსახურში ამბობენ, რომ საქმე ეხება ჯგუფურად, მარკირებას დაქვემდებარებული განსაკუთრებით დიდი ოდენობით აქციზური საქონლის, აქციზური მარკის გარეშე გადაზიდვის ფაქტს. უწყების ცნობითვე, ჩხრეკის შედეგად ამოღებულია 8 310 კოლოფი უაქციზო სიგარეტი, რომლის სავარაუდო ღირებულება 34 000 ლარს აღემატება.

გამოძიება მიმდინარეობს საქართველოს სისხლის სამართლის კოდექსის მე-200 მუხლის მე-2 და მე-3 ნაწილებით, რაც მარკირებას დაქვემდებარებული აქციზური საქონლის აქციზური მარკის გარეშე გამოშვება, შენახვა, რეალიზაციას ან გადაზიდვას გულისხმობს. დანაშაული სასჯელის სახით ითვალისწინებს თავისუფლების აღკვეთას ექვსიდან რვა წლამდე ვადით.