პრემიერმინისტრის, გიორგი გახარიას განცხადებით, საქართველოსა და აზერბაიჯანს შორის არანაირი პრობლემა არ არსებობს და სტრატეგიულ პარტნიორობასა არაფერი ემუქრება. მისი თქმით, "რაღაც ინტერნეტგამოცემის" გავრცელებული ინფორმაციის საფუძველზე ჟურნალისტების მიერ "მოძმე ქვეყნებს" შორის ურთიერთობებზე კითხვის დასმა რისკისშემცველია.

"ჯერ ეს ერთი, ეს არის მხოლოდ მედიით გავრცელებული დაუზუსტებელი ინფორმაცია. ეს საყურადღებო ინფორმაცია იქნება მაშინ, როცა იქნება ჩვენს ორ ქვეყანას შორის მსჯელობის საგანი. აზერბაიჯანსა და საქართველოს შორის სტრატეგიულ პარტნიორობას და ძმობასაც არაფერი არ ემუქრება. შეუძლებელია, რომ ამ უმაღლესი ხარისხის ურთიერთობებს რამე დაემუქროს. [...]

როდესაც რაღაც ინტერნეტგამოცემის გავრცელებული ინფორმაციის საფუძველზე კითხვას მისვამთ კონტექსტურად ორ სტრატეგიულ ქვეყანას შორის, მოძმე ქვეყანას შორის ურთიერთობების კონტექსტში, არასწორია. ესეც არის რისკი", — ასე გამოეხმაურა პრემიერი აზერბაიჯანული პროსახელისუფლებო მედიის ბრალდებებს იმის შესახებ, რომ სომხეთში იარაღი საქართველოს გავლით შედის.

გახარიამ აღნიშნა ისიც, რომ გამოცემის გავრცელებული ფოტო, რომელიც ბრალდებების დასამტკიცებლად გამოიყენეს, საკმარის ინფორმაციას არ იძლევა:

"ნანახი გაქვთ ეს ფოტო? ეს არის ჩვეულებრივი სატვირტო მანქანა ყველაფრის გარეშე და რა შეიარაღება?"

ჟურნალისტებმა დაუზუსტეს პრემიერს, რომ ინფორმაციას სამთავრობო მედია ავრცელებს, რაზეც პრემიერმა განაცხადა: "რას ნიშნავს სამთავრობო მედია? აზერბაიჯანის სამთავრობო მედია?"

სომხეთ-აზერბაიჯანის საზღვარზე მიმდინარე კონფლიქტთან დაკავშირებით ერთ-ერთმა აზერბაიჯანულმა გამოცემამ, haqqin.azz სარედაქციო წერილი გაავრცელა. რედაქციის მტკიცებით, აქვთ ინფორმაცია, რომ სომხეთმა აზერბაიჯანზე თავდასხმისთვის მზადება რამდენიმე დღით ადრე დაიწყო და საბრძოლო დახმარება სერბეთიდან საქართველოს გავლით მიიღო.

საქართველოს საგარეო საქმეთა სამინისტრომ არ დაადასტურა ეს ინფორმაცია და განაცხადა, რომ სტატია ტენდენციურ ხასიათს ატარებს და ორ სტრატეგიულ პარტნიორ შორის პრობლემების ხელოვნურად შექმნისკენაა მიმართული.

ამის პასუხად გამოცემამ ფოტო გაავრცელა, რომელიც, სავარაუდოდ, სომხეთ-საქართველოს საზღვარზეა გადაღებული და ჩანს სატვირთო მანქანა. მათი მტკიცებით, სწორედ ამ მანქანებით გადაჰქონდათ იარაღი.