შინაგან საქმეთა სამინისტროსთან მიმდინარე აქციაზე პოლიციამ 3 პირი დააკავა. როგორც On.ge-ს უწყების პრესსამსახურში უთხრეს, გამოძიება დაწყებულია ადმინისტრაციულ სამართალდარღვევათა კოდექსის 173-ე მუხლით, რაც პოლიციის განკარგულებისადმი ან მოთხოვნისადმი დაუმორჩილებლობას გულისხმობს.

სამინისტროსთან აქცია "ნუ მომკლავ, გამოიძიე დანაშაული" მიმდინარეობს. სიტუაცია მას შემდეგ დაიძაბა, რაც აქციის მონაწილეებმა გზის სავალ ნაწილზე გადასვლა გადაწყვიტეს. სწორედ ამ დროს დააკავეს სამი პირი.

გარდა ამისა, აქციის მონაწილეებმა ტროტუარზე წარწერების დატოვება სცადეს, რის საშუალებასაც პოლიცია არ აძლევდა.

შეცვალეს აქტივისტის ნიკა ფარულავას თქმით, დაკავებულები ხელწერილის საფუძველზე გამოუშვეს, ხოლო ტროტუარებზე წარწერების გამო რამდენიმე პირი დააჯარიმეს.

აქციის ორგანიზატორია მოძრაობა შეცვალე და მას მოძრაობები გაბედესა და სირცხვილიას წევრებიც უერთდებიან. აქცია წუთიერი დუმილით დაიწყო.

აქციაზე გაიხსენეს 19 წლის ფეხბურთელი გიორგი შაქარაშვილი და 23 წლის თამარ ბაჩალიაშვილი, რომელსაც ხუთი დღის განმავლობაში ეძებდნენ და დღეს, 22 ივლისს იპოვეს.

"ეს ეხება ყველა იმ საქმეს, რომელიც ნელ-ნელა ჯაჭვით აეწყო ქართული ოცნების მმართველობას და გადაება ერთმანეთს. მომავალში მე და თქვენ რომ არ აღმოვჩნდეთ იმ სიტუაციაში, რაშიც გუშინ თამარის [ბაჩალიაშვილის] ოჯახი აღმოჩნდა, უნდა გამოვიდეთ გარეთ", — განაცხადა აქციის ერთ-ერთმა მონაწილემ.

აქციაზე ორგანიზატორებმა გააჟღერეს, რომ აპირებენ ეს პროცესი გახდეს უწყვეტი, სანამ ყველა დამნაშავე არ დაისჯება.