ნაციონალური მოძრაობის წევრის, გივი თარგამაძის განცხადებით, 4 ოქტომბერს თავისი მანქანის აფეთქების საქმის დეტალებს პროკურატურა არ აცნობს.

აღნიშნულის შესახებ დღეს, 9 დეკემებერს გამართულ ბრიფინგზე გივი თარგამაძემ ისაუბრა:

"4 ოქტომბრის აფეთქების გამოძიებასთან დაკავირებით, შემიძლია ვთქვა, რომ არჩევნების შემდგომ საგამოძიებო უწყებებმა ინტერესი დაკარგეს. ამიტომ, მე ჩემი ძალებით მიწევს ისინი ვაიძულო ჩაატარონ თითოეული ის საპროცესო მოქმედება, რომელიც მათი ვალდებულობაა.

გამოძიების დაწყებიდან 2 თვის შემდეგ ჩემი ძალისხმევით მივაღწიე იმას, რომ დაზარალებულად მცნეს, რაც პროკურატურას ავტომატურად უჩენს ვალდებულებას საქმის მასალები გამაცნონ, რაზეც ჯიუტად აცხადებენ უარს".

თარგამაძის განცხადებით, მას ეჭვი აქვს, რომ პროკურატურა ცდილობს გამოძიება საკუთარი ინტერესების დაცვით წარმართოს.

შინაგან საქმეთა მინისტრომ 7 ოქტომბერს გამოაცხადა, რომ სამართალდამცავებმა 3 დღიანი ოპერაციის შედეგ გახსნეს დეპუტატ გივი თარგამაძის ავტომობილის აფეთქების ფაქტი. მისი თქმით, შსს-ს, სუს-ისა და პროკურატურის ერთობლივი ღონისძიებებით დადგინდა დანაშაულში მონაწილე სავარაუდო პირი, თუმცა გაგარძელდა დამატებითი საგამოძიებო მოქმედებები მტკიცებულებების მოპოვების მიზნით.

4 ოქტომბერს, თბილისში, კოლმეურნეობის მოედნის მიმდებარე ტერიტორიაზე ნაციონალური მოძრაობის წევრის, გივი თარგამაძის მანქანა ააფეთქეს. დაზიანდა მიმდებარე შენობები, ასევე ახლომდებარე ავტომობილები, დაშავდნენ გამვლელები. ჯანდაცვის მინისტრის ინფორმაციით, მანქანის აფეთქებისას დაშავებულთა რიცხვი ხუთია. მათგან ერთ-ერთს საავადმყოფოში ოპერაცია ჩაუტარდა.