მართალია, კრისტოფერ ნოლანი გვპირდებოდა, რომ პანდემიის შემდეგ თავისი ახალი ფილმით მაყურებლებს კინოთეატრებში დააბრუნებდა, თუმცა მოვლენების შესაძლო განვითარება Inception-ისა და Interstellar-ის სცენარისტმაც კი ვერ ივარაუდო სწორად.

გუშინ ნოლანის ახალი ფილმის Tenet კინომწარმოებელმა კომპანიამ ოფიციალური განცხადება გაავრცელა, სადაც აღნიშნულია, რომ ფილმის პრემიერა კვლავ გადაიდო.

Tenet-ის თავდაპირველი პრემიერა 17 ივლისს იყო დაგეგმილი, შემდეგ ეს თარიღი 31 ივლისამდე გადაიწია, ივნისის ბოლო კი განაცხადეს, რომ 12 აგვისტოს ვიხილავდით ფილმს კინოთეატრებში. თუმცა, ამჟამინდელი ცნობების მიხედვით, კრისტოფერ ნოლანის ახალი ნამუშევრის შეფასებას კიდევ ცოტა ხანს ვერ შევძლებთ.

"ჩვენი მიზანია, რომ ჩვენმა წარმოებულმა ფილმებმა მაქსიმალურ წარმატებას მიაღწიონ და ამავდროულად მხარი დავუჭიროთ პარტნიორ კინოთეატრებს, როცა კვლავ უსაფრთხოდ ამოქმედებას შეძლებენ. სამწუხაროდ, პანდემია კვლავ აგრძელებს გავრცელებას, რაც ჩვენს გეგმებს მუდმივად ცვლის. სწორედ ამის გამო გადავწყვიტეთ, რომ დაგეგმილი საპრემიერო თარიღები შევცვალოთ. მალე გაგიზიარებთ კრისტოფერ ნოლანის Tenet-ის პრემიერის ახალ თარიღს", — განაცხადა Warner Bros. Pictures-ის წარმომადგენელმა.

აღნიშნულ განცხადებაში ასევე ხაზი გაესვა იმასაც, რომ შესაძლოა, ფილმის პრემიერა განსხვავებულ ფორმატშიც შედგეს:

"Tenet-ის პრემიერა ტრადიციულ ფორმატში — ერთ დღეს მსოფლიო პრემიერა — არ შედგება და ჩვენი მარკეტინგული და სადისტრიბუციო გეგმები შესაბამისად აისახება ამაზე".

"არატრადიციულ ფორმატში" ცხადია, არ უნდა ვიფიქროთ, რომ შესაძლოა ფილმის პრემიერა კინოთეატრებში გამოსვლის გარეშე, მაგალითად რომელიმე სტრიმინგ სერვისზე შედგება: ცნობილია, რომ კრისტოფერ ნოლანი სწორედ კინოთეატრების მხარდამჭერია და ამავდროულად ფილმების კინოში ნახვის მომხრეცაა.

შესაბამისად, დიდი ალბათობით, უბრალოდ უნდა ველოდოთ, რომ ნოლანის ახალ ფილმს მსოფლიოს სხვადასხვა კუთხეში მცხოვრები მაყურებლები სხვადასხვა დროს იხილავენ: სადაც პანდემიასთან წარმატებული ბრძოლის გამო კინოთეატრები გაიხსნა, ჯერ იქ შედგება პრემიერა, უფრო გვიან კი აშშ-ის მსგავს ქვეყნებში, სადაც შედარებით უფრო მძიმე შედეგებია ამ მხრივ დღემდე.

ასევე იხილეთ: