კინოსამყაროში ცნობილია, რომ კრისტოფერ ნოლანი მასშტაბური სცენების გადაღებისას კომპიუტერული სპეცეფექტების გამოყენების ნაცვლად რეალური გარემოს შექმნასა და ნამდვილ რეკვიზიტებს ანიჭებს უპირატესობას.

თუმცა თავისი ახალი ფილმის Tenet გადაღებისას სრულიად ახალ მასშტაბებს მიაღწია და ნამდვილი ბოინგ 747 გამოიყენა, როცა ერთ-ერთ სცენაში თვითმფრინავი შენობას ეჯახება და ფეთქდება.

"თავდაპირველად დაგეგმილი იყო, რომ ეს სცენა მინიატურული ფიგურებით, დეკორაციების შექმნითა და ვიზუალური ეფექტების დახმარებით გადაგვეღო. თუმცა კალიფორნიაში გადასაღები მოედნის შერჩევისას უამრავი ძველი თვითმფრინავი აღმოვაჩინეთ. მაშინვე დავიწყეთ ხარჯების დაანგარიშება... ცხადი იყო, რომ რეალური ზომის ნამდვილი თვითმფრინავით უფრო მივაღწევდით სასურველ შედეგეს, ვიდრე კომპიუტერული გრაფიკით. ამიტომაც ჩვენ ეს გავაკეთეთ და ძალიან კარგი შედეგიც მივიღეთ", — განაცხადა კრისტოფერ ნოლანმა ერთ-ერთ ინტერვიუში.

ეს ცნობილი კადრი რამდენიმე დღის წინ გამოქვეყნებულ ფილმის ახალ ტრეილერში გამოჩნდა.

ფოტო: Warner Bros.

ამ დეტალთან დაკავშირებით მსახიობმა რობერტ პატინსონმაც ისაუბრა GQ-სთან მიცემულ ინტერვიუში:

"როცა ამ სცენას ვიღებდით, მახსოვს, ვფიქრობდი: "კინოში მსგავსი რამ საერთოდ კიდევ რამდენჯერ მოხდება?"

ვიზუალურ დეტალებთან ერთად განსაკუთრებულია ფილმის სიუჟეტიც: თავად მსახიობებსაც კი გაუჭირდათ თავდაპირველად, რომ რეჟისორის სათქმელი და ამ ფილმის იდეა გაეგოთ.

Tenet-ის გადაღება $205 მილიონი დაჯდა და მისი პრემიერა 17 ივლისსაა დაგეგმილი, შესაბამისად, თუ არაფერი შეიცვალა, მაყურებლებსაც სწორედ მაშინ შეეძლებათ კრისტოფერ ნოლანის ეს ახალი ამბიციური პროექტი შეაფასონ.