პარლამენტის ვიცე-სპიკერი, გია ვოლსკი ამბობს, რომ ისეთ ოპოზიციას ინატრებდა, რომელიც ინტელექტუალურ ოპონირების გაწევას შეძლებდა. ვოლსკის თქმით, ჭეშმარიტება აზრთა ჭიდილში იბადება.

"ვინატრებდი, იყოს ოპოზიციის ის რესურსი საქართველოში, რომელიც ინტელექტუალურად ოპონირებას გიწევს და ამ აზრთა ჭიდილში იბადება ჭეშმარიტება. მომავალში ვერ ვხედავ კონსტრუქციული აზრთა დაპირისპირების პერსპექტივას, თუმცა იმედი მაქვს, რომ პარლამენტში (ვინაიდან პარლამენგტში უფრო პლურალისტური იქნება და გაფართოვდება პოლიტიკური ძალების მონაწილეობა), აღმოჩნდება მაინც და დაიმკვიდრებს საერთაშორისო ევროპული წარმატებული სტანდარტი იმ დავისა, რომელიც აუცილებელია ქვეყნის განვითარებისთვის", —განაცხადა ვოლსკიმ მაესტროს ეთერში.

დღეს, 20 ივლისს ქართულმა ოცნებამ მაჟორიტარი დეპუტატობის კანდიდატები წარადგინა. მაჟორიტარების სიაში მოხვდნენ ოცნების, როგორც ძველი, ასევე, ახალი სახეები, მათ შორის ქალი მხოლოდ ერთია. მაჟორიტარად არ წარუდგენიათ იმ დეპუტატების ნაწილი, რომლებმაც მაჟორიტარული სისტემის უპირატესობის მოტივით პროპორციულს კანონპროექტი ჩააგდეს.

გაიგეთ მეტი "ოცნების" მაჟორიტარების წარდგენაზე:

შეგახსენებთ, რომ მას შემდეგ, რაც მმართველი გუნდის ლიდერმა, ბიძინა ივანიშვილმა პირობა არ შეასრულა და პროპორციული საარჩევნო სისტემის კანონპროექტი ჩავარდა, ოპოზიცია ბოიკოტის რეჟიმში გადავიდა. საპროტესტო აქციების, პარლამენტის პიკეტირებების, აქციების დაშლისა და ფასილიტატორი ელჩების ჩართვის შემდეგ, ოპოზიცია და მმართველი გუნდი ახალ "თითქმის პროპორციულ" საარჩევნო სისტემაზე შეთანხმდა, რომლის მიხედვითაც პარლამენტში საარჩევნო სიით 120 დეპუტატი შევა, 30-ს კი მაჟორიტარულ ოლქებში აირჩევენ. საპარლამენტო არჩევნები 2020 წლის ოქტომბერში სწორედ ამ სისტემით ჩატარდება.