ჟიზელ ბიუნდჰენი წლევანდელ დაბადების დღეზე მშობლიური პლანეტისთვის სამადლობელი ხარკის გადახდას აპირებს. გასულ შაბათს გერმანული წარმომავლობის ბრაზილიელმა სუპერმოდელმა საკუთარი იდეა გაგვიზიარა, თუ როგორ სურს მოახლოებული მე-40 დაბადების დღის აღნიშვნა. იდეა კი ამაზონის ტყეში 40 ათასი ხის დარგვას მოიაზრებს.

"როგორც ზოგიერთმა თქვენგანმა იცის, ჩემი დაბადების დღე 20 ივლისსაა. და ეს დღე ყველა სხვა დაბადების დღისგან გამორჩეული იქნება! არც კი მჯერა, რომ 40 წლის ვხდები. ისეთი შეგრძნება მაქვს, თითქოს ჩემი ცხოვრების ახალი თავი იწყება და მსურს, ეს თავი აზრიანი გზით დავიწყო, ამიტომ, გადავწყვიტე, 40 ათასი ხე დავრგო", — წერს ორი შვილის დედა ინსტაგრამზე.

ბიუნდჰენის შთამაგონებელ პოსტს ერთვის რამდენიმე ფოტო, სადაც ასახულია, როგორ რგავს იგი ხეებს ძველი და ამჟამინდელი პროექტების ფარგლებში. ფოტოებში ასევე ჩანს მოდელის ქმარი, NFL-ის ვარსკვლავი ტომ ბრეიდი და მათი ორი შვილი: ათი წლის ბენჯამინ რაინი და შვიდწლინახევრის ვივიენ ლეიქი, რომლებიც მშობლებს ეხმარებიან.

ბიუნდჰენი ამბობს, რომ "წლების განმავლობაში სხვადასხვა პროექტის ფარგლებში რგავდა ხეებს" და მისი აზრით, ეს "საუკეთესო გზაა, რომელიც მან იცის, მშობლიური დედამიწისთვის სამადლობელი ხარკის გადასახდელად".

თავდაპირველად, ბიუნდჰენი თავისი გამორჩეული დაბადების დღის აღსანიშნავად, თავად აპირებდა ოჯახთან ერთად ამაზონის ტყეში გამგზავრებას და ხეების დარგვას, თუმცა, როგორც ის ამბობს, კორონავირუსის პანდემიის გამო არსებულმა შეზღუდვებმა მისი გეგმა ჩაშალა.

"შემდეგ თავში სხვა ფიქრმა გამიელვა! რა იქნებოდა, რომ ხეების დასარგავად სხვებისთვის მეთხოვა დახმარება?", — ამბობს ვარსკვლავი, — "უკვე ველაპარაკე ჩემს ოჯახსა და მეგობრებს — და ისინი ჩემთვის განკუთვნილ საჩუქრებს დასარგავ ხეებად აქცევენ. ამგვარად, ჩვენ შეგვიძლია, ჩვენი პლანეტისთვის სამადლობლად რაიმე ვუძღვნათ მას".

ბიუნდჰენი უკვე დიდი ხანია, მდგარი განვითარების და გარემოს დამცველია. სულ ახლახან მან Marie Claire-თან ისაუბრა, თუ როგორ ასწავლის თავის შვილებს პლანეტაზე ზრუნვის მნიშვნელობას.

"ჩვენი ოჯახი მრავალჯერადი გამოყენების წყლის ბოთლებს მოიხმარს და ამგვარად ბავშვებიც იგებენ, რომ ერთჯერადი პლასტმასა ჩვენი პლანეტისთვის საზიანოა", — ამბობს სუპერმოდელი, — "ვხედავ, როგორ ესაუბრებიან ისინი მათ მეგობრებს გარემოს დაცვაზე და როგორ აჩვენებენ საკუთარ წყლის ბოთლებს. იმედი აქვთ, რომ ისინიც მიბაძავენ და ასეთ ბოთლებს გამოიყენებენ".

ბიუნდჰენი ასევე აღნიშნავს, რომ "[თავის] შვილებს გარემოზე ზრუნვის სამ გზას ასწავლის: შემცირება, ხელმეორედ გამოყენება, გადამუშავება".

"როცა პროდუქტების მაღაზიაში მივდივართ, ყოველთვის საკუთარი ჩანთა მიგვაქვს, ხოლო ადგილობრივი ფერმერებისგან საკვების ყიდვით შესაფუთ მასალას ვზოგავთ", — ამბობს იგი, — "ჩვენ ვცდილობთ, მაქსიმუმი გავაკეთოთ, თუმცა, ზოგჯერ რთულია, "მწვანედ" იცხოვრო — და ეს ნორმალურია. ჩემს შვილებს ყოველთვის ვახსენებ, რომ ჩვენი მიღებული გადაწყვეტილებები პლანეტაზე ზემოქმედებას ახდენს, ჩვენ კი უნდა ვეცადოთ, მისთვის სასიკეთო მაქსიმუმი გავაკეთოთ. ეს არის მნიშვნელოვანი".

ბიუნდჰენის თქმით, "დედობის" მისი საყვარელი მომენტებია, როცა ისინი "ბუნებაში ატარებენ დროს და კეთებით სწავლობენ":

"მიყვარს, როცა ვხედავ, როგორ უხარიათ ჩემს შვილებს ქათმის კალათში ახალი კვერცხების პოვნა ან ჩვენი ბაღიდან ბოსტნეულის მოსავლის აღება".