ბოლივუდის ვარსკვლავი და ყოფილი მის მსოფლიო აიშვარია რაი ბაჩანი, რვა წლის შვილთან ერთად, საავადმყოფოში გადაიყვანეს. ერთი კვირის წინ მათ კორონავირუსი დაუდასტურდათ.

აიშვარია რაის ქმარი, მსახიობი აბჰიშეკ ბაჩანი და მისი მამამთილი, მსახიობი და პოლიტიკოსი ამიტაბჰ ბაჩანი უკვე საავადმყოფოში არიან მოთავსებულები იგივე დიაგნოზით. ინდოეთში, სადაც კორონავირუსის მილიონზე მეტი შემთხვევაა დაფიქსირებული, დაავადება არაერთ ცნობილ ადამიანს დაუდასტურდა.

ინდოეთის ერთ-ერთი წამყვანი მსახიობი, შვილთან, აარადჰიასთან, ერთად სახლში იმყოფებოდნენ თვითიზოლაციაში, თუმცა, როგორც ადგილობრივი გაზეთი, The Times of India, იუწყება, ორივე მათგანი ნანავატის საავადმყოფოში გადაიყვანეს "სუნთქვის უკმარისობის" ჩივილით.

"თავს კარგად გრძნობენ", — განაცხადა საავადმყოფოს წარმომადგენელმა ინდურ გამოცემასთან.

77 წლის ამიტაბჰ ბაჩანი და მისი 44 წლის ვაჟი, აბჰიშეკი, საავადმყოფოს საკარანტინო პალატაში არიან მოთავსებულები. ჰოსპიტალიზაციისას მათი სიმპტომები "რბილად" შეფასდა.

მას შემდეგ მათი ჯანმრთელობის მდგომარეობაზე დამატებითი ინფორმაცია აღარ გავრცელებულა, თუმცა ამიტაბჰი სიახლეებს ტვიტერზე რეგულარულად იტყობინება.

"ბედნიერ დროს, ავადმყოფობის დროს, თქვენ, ჩვენო ახლობელო და ძვირფასო ადამიანებო, ჩვენო კეთილისმსურველებო, ჩვენო გულშემატკივრებო, მუდმივად უსაზღვრო სიყვარულს გამოხატავდით", — წერს იგი.

აიშვარია რაი მეუღლესთან და მეუღლის მშობლებთან ერთად.

აიშვარია რაი მეუღლესთან და მეუღლის მშობლებთან ერთად.

ფოტო: Indranil Mukherjee / AFP photo

აიშვარია რაიმ მის მსოფლიოს გვირგვინი 1994 წელს მოიპოვა და მას შემდეგ იგი ბოლივუდის ერთ-ერთ ყველაზე ცნობად სახედ იქცა. მსახიობი, რომელიც აბჰიშეკ ბაჩანზე 2007 წელს დაქორწინდა, მუდმივად ჩნდებოდა კანის კინოფესტივალის წითელ ხალიჩაზე.

აბჰიშეკის მამა, რომელსაც სახელით Big B იცნობენ, ინდოეთში არაერთი ადამიანის კერპად მიიჩნევა და კინოინდუსტრიაში ოთხ ათწლეულზე მეტი დრო აქვს გატარებული.

ამიტაბჰ ბაჩანი 1999 წელს, BBC-ის ონლაინ გამოკითხვაში "ათასწლეულის მსახიობი" მონაწილეობდა. იგი ასევე პირველი ინდოელი მსახიობია, რომლის მსგავსი ცვილის ფიგურაც ლონდონის მადამ ტიუსოს მუზეუმში განთავსდა.

მუმბაის ადგილობრივი ხელისუფლების განცხადებით, ქვეყნის ფინანსურ ცენტრსა და კინოდედაქალაქში კორონავირუსის თითქმის 100 ათასი შემთხვევაა დაფიქსირებული, რომელსაც ყოველდღიურად 1200 ახალი პაციენტი ემატება. გარდაცვლილთა რაოდენობა კი 5 582 ადამიანზე მეტს შეადგენს.

ქვეყნის მასშტაბით, ინდოეთში, რომლის მოსახლეობაც 1,3 მილიარდს შეადგენს, კორონავირუსისგან 26 ათასი ადამიანი დაიღუპა.