გია ვოლსკის განცხადებით, მართალია, ქართულ ოცნებას მაჟორიტარად მხოლოდ ერთი ქალი კანდიდატი ჰყავს წარდგენილი, მაგრამ სხვა ყველა კანდიდატი არის ადამიანი, ვინც "ქალბატონებს პატივს სცემს".

On.ge-ის კითხვაზე, თუ რატომ ჰყავს მმართველ გუნდს მხოლოდ ერთი ქალი მაჟორიტარი დეპუტატობის კანდიდატი, ქართული ოცნების ვიცე-სპიკერმა, გია ვოლსკიმ ასეთი პასუხი გასცა:

"მაჟორიტარობის ყველა კანდიდატი არის ადამიანი, ვინც იცის ფასი ქალბატონის და ქალბატონების მონაწილეობისა პოლიტიკაში. აქედან გამომდინარე, ჩვენ ერთი აზრი გვექნება, როდესაც სიის შედგენაზე დავიწყებთ მუშაობას".

ერთადერთი მაჟრიტარი ქალი კანდიდატის, ნინო ლაცაბიძის წარდგენისას ირაკლი კობახიძემ თქვა, რომ ის ყველაფერს "წარმატებით უთავსებს 4 შვილის დედობას".

"ნინოს აქვს ხანგრძლივი მენეჯერული გამოცდილება საჯარო სამსახურში. დღეს ის არის თბილისის საკრებულოს აქტიური წევრი და რაც განსაკუთრებით მნიშვნელოვანია, ამ ყველაფერს წარმატებით უთავსებს 4 შვილის დედობას", — თქვა პარტიის საარჩევნო შტაბის ხელმძღვანელმა.

დღეს, 20 ივლისს ქართულმა ოცნებამ მაჟორიტარი დეპუტატობის კანდიდატები წარადგინა. მაჟორიტარების სიაში მოხვდნენ ოცნების, როგორც ძველი, ასევე, ახალი სახეები, მათ შორის ქალი მხოლოდ ერთია. მაჟორიტარად არ წარუდგენიათ იმ დეპუტატების ნაწილი, რომლებმაც მაჟორიტარული სისტემის უპირატესობის მოტივით პროპორციული კანონპროექტი ჩააგდეს.

გაიგეთ მეტი "ოცნების" მაჟორიტარების წარდგენაზე:

შეგახსენებთ, რომ მას შემდეგ, რაც მმართველი გუნდის ლიდერმა, ბიძინა ივანიშვილმა პირობა არ შეასრულა და პროპორციული საარჩევნო სისტემის კანონპროექტი ჩავარდა, ოპოზიცია ბოიკოტის რეჟიმში გადავიდა. საპროტესტო აქციების, პარლამენტის პიკეტირებების, აქციების დაშლისა და ფასილიტატორი ელჩების ჩართვის შემდეგ, ოპოზიცია და მმართველი გუნდი ახალ "თითქმის პროპორციულ" საარჩევნო სისტემაზე შეთანხმდა, რომლის მიხედვითაც პარლამენტში საარჩევნო სიით 120 დეპუტატი შევა, 30-ს კი მაჟორიტარულ ოლქებში აირჩევენ. საპარლამენტო არჩევნები 2020 წლის ოქტომბერში სწორედ ამ სისტემით ჩატარდება.