ექიმი ვაჟა გაფრინაშვილი ოკუპანტების მიერ გატაცებული ზაზა გახელაძის ოჯახს ესტუმრა და მათ თანადგომა გამოუცხადა. როგორც გაფრინდაშვილი ამბობს, ის სიტუაცია, რაშიც ახლა გახელააძეების ოჯახია, მისი ოჯახისთვისაც ცნობილია და ამიტომ ის და მისი ოჯახი მათ გამოცდილებას გაუზიარებენ.

"მე და ჩემი მეუღლე ვესტუმრეთ გახელაძეების ოჯახს, რათა გამოვუცხადოთ თანადგომა იმ სიტუაციის გამო, რაშიც დღეს გახელაძეების ოჯახი იმყოფება. ეს სიტუაცია ჩემს ოჯახს საკმაოდ მწვავედ აქვს გავლილი თითქმის თვენახევრის განმავლობაში და იციან თუ რა არის საჭირო, რომ სამართალმა გაიმარჯვოს. პირველ რიგში საჭიროა ამ ოჯახისადმი ყველა ჩვენგანის მხარში დადგომა", — განუცხადა ფორმულას გაფრინდაშვილმა.

როგორც ვაჟა გაფრინდაშვილმა აღნიშნა, საოკუპაციო რეჟიმი ახალ მეთოდებს მიმართავს მოსახლეობის დასაშინებლად და ახლა უკვე სისხლის სამართლის საქმეებს ედავება გატაცებულებს.

ოკუპანტებმა ზაზა გახელაძე კასპში 11 ივლისს გაიტაცეს, მანამდე კი ცეცხლსასროლი იარაღით დაჭრეს.

რუსული მხარის მტკიცებით, ზაზა გახელაძემ ცეცხლი პირველმა გახსნა. მათივე მტკიცებით, გახელაძემ ჩვენებაში აღიარა, რომ საოკუპაციო საზღვარი მიზანმიმართულად გადაკვეთა.

ქვეყანა, რომელსაც საქართველოს ტერიტორიები 2008 წლის შემდეგ ოკუპირებული აქვს, "პოლიტიკური სპექტაკლის" მოწყობაში თბილისს ადანაშაულებს. თუმცა პრობლემის მოგვარების გზად რუსეთი მხოლოდ საზღვრის დელიმიტაცია/დემარკაციაში ხედავს.

ოკუპირებული ცხინვალის მტკიცებით, საოკუპაციო ძალების მიერ დაჭრილი და დაკავებული ზაზა გახელაძე კარანტინში გადაიყვანეს.

დე ფაქტო ხელისუფლების სამხედრო პროკურორის, ტიგრან კაბულოვის თქმით, გახელაძე კარანტინში გადაიყვანეს, რათა დარწმუნდნენ, რომ კორონავირუსით ინფიცირებული არ არის.

მისივე თქმით, გახელაძის წინააღმდეგ საქმე აღძრულია სამხედრო მოსამსახურის სიცოცხლის ხელყოფისა და სახელმწიფო საზღვრის უკანონოდ გადაკვეთის მუხლით.