ყველა დროის ერთ-ერთ საუკეთესო ნაწარმოებად აღიარებული დიდი გეტსბის საავტორო უფლებები 2021 წლის 1-ლ იანვარს იწურება, რაც ნიშნავს, რომ წიგნი საჯარო დომენში ხვდება და პირველად იქნება შესაძლებელი მისი უფასოდ ადაპტაცია.

მწერალმა მაიკლ ფარის-სმიტმა დააანონსა, რომ ის ფრენსის სკოტ ფიცჯერალდის კლასიკის პრიქველს გამოსცემს. Nick ნიკ კარაუეის პერსონაჟზე იქნება ფოკუსირებული და დიდი გეტსბის საავტორო უფლებების გასვლიდან ოთხ დღეში, 5 იანვარს, გამოვა აშშ-ში.

"ნიკ კარაუეი ჩრდილიდან გამოვა და ყურადღების ცენტრში მოექცევა", — ამბობენ გამომცემლები. წიგნი მის ადრეულ ცხოვრებაზე მოგვიყვება, სანამ ის ფიცჯერალდის რომანში ენიგმატურ მილიონერ ჯეი გეტსბის შეხვდებოდა.

ფარის-სმიტის თქმით, მას ყოველთვის ძალიან იზიდავდა ნიკ კარაუეის პერსონაჟი.

"ბოლოს რომ წავიკითხე გეტსბი, რამდენიმე წლის წინ, ნიკი ჩემს წარმოსახვაში დარჩა. ის ამ ამბავში იმდენად ცოტას გვიმხელს საკუთარ თავზე, რომ ძალაუნებურად გონებაში მისი შექმნა დავიწყე და ვიცოდი, რომ მასზე უნდა დამეწერა. ამიტომაც გავყევი იდეას და გადავეშვი მასში, შემოქმედების მამოძრავებელი მთელი თავისი ემოციებით", — თქვა ავტორმა.

წიგნის პრიქველში ნიკის პერსონაჟი პირველი მსოფლიო ომის სასანგრე მოქმედებებშია მოქცეული. გამომცემლობის მთავარი რედაქტორის, ჯოფრი მალიგანის, თქმით, ფარის-სმიტის ეს ამბავი გამორჩეულია.

"სანგრები და ბომბებით დატოვებული ჩაღრმავებები ძალიან მკაფიოა, გვირაბების სიჩუმე კი — დამაყრუებელი. და დასასრული — ეს ჭკვიანური დასასრული, რომელმაც ნიკის ისტორია დაამთავრა, თანაც ისე, რომ უესტ-ეგის ახალი სამყარო გახსნა — იდეალურია", — თქვა მან.