საპატრულო პოლიციის ყოფილი უფროსს, დავით ცინარიძეს აღკვეთის ღონისძიება შეეცვალა და ის გირაოს სანაცვლოდ გაათავისუფლეს.

როგორც On.ge-ს თბილისის საქალაქო სასამართლოში უთხრეს, 26 ივნისს მოსამართლემ დაცვის მხარის შუამდგომლობა დააკმაყოფილა და ბრალდებულს პატიმრობა 30 000-ლარიანი გირაოთი შეუცვალა.

უცნობია, როდის გააგრძელებს სასამართლო ცინარიძის ბრალეულობაზე მსჯელობას. სასამართლოში ამბობენ, რომ კოლეგია შვებულებაშია.

გამოძიების ინფორმაციით, მიმდინარე წლის 27 აპრილს ცინარიძემ ცოლს სიტყვიერი და ფიზიკური შეურაცხყოფა მიაყენა, იარაღის გამოყენებით დაემუქრა და ერთხელ გაისროლა კიდეც. ის მეორე დღეს დააკავეს.

დავით ცინარიძე 2015 წელს საპატრულო პოლიციის დეპარტამენტის უფროსის თანამდებობიდან გაათავისუფლეს და კადრების განყოფილებაში გადაიყვანეს. მანამდე ნაციონალურმა მოძრაობამ გაავრცელა ვიდეოკადრები, სადაც ჩანდა, რომ მოქალაქე ეკა ყუშიტაშვილი დავით ცინარიძის სახელის გამოყენებით პატრულზე ზეწოლას ცდილობდა. ამ ამბის შემდეგ ცინარიძემ სისტემაში მუშაობა გააგრძელა, თუმცა სხვა პოზიციაზე.