ამერიკელი კონგრესმენი, ადამ კინზინგერი ტვიტერზე ქართული პროსახელისუფლებო ტროლ-ანგარიშების გააქტიურებას გამოეხმაურა. კინზინგერმა DFRLab-ის ახალი ანგარიში გააზიარა, რომელიც ტვიტერზე ანტიდასავლური აქტორების საეჭვო ანგარიშებს ეხება.

"ეს პუტინის ხელწერაა. მას მიზანში თავისუფლების მოყვარული ხალხი ჰყავს ამოღებული, ცდილობს დემოკრატიულ არჩევნებში ჩარევას და საკუთარი მოგებისთვის ქაოსს თესავს. ეს საცოდაობაა, მაგრამ ეს პუტინის რეჟიმია", — წერს კონგრესმენი.

DFRLab-ის ახალ კვლევაში ნათქვამია, რომ მას შემდეგ, რაც აშშ-ს რესპუბლიკური პარტიის წარმომადგენელმა ადამ კინზინგერმა საქართველოს ხელისუფლება დემოკრატიული ღირებულებების დაუცველობისთვის გააკრიტიკა, ტვიტერის საეჭვო ანგარიშებმა კონგრესმენი ქვეყნის საშინაო საქმეებში ჩარევაში დაადანაშაულა. ერთ-ერთი ანგარიში დიდი ალბათობით დაკავშირებულია ფეისბუქ გვერდთან, ანტილიბერალური დოქტრინა, რომელიც თავის მხრივ ანტი დასავლურ, ანტი ოპოზიციურ და პრორუსულ ნარატივს ავრცელებს.

აღნიშნული ანგარიშების გამოჩენა, რომელთა ნაწილი აშკარად ყალბია, წინ უძღვის საქართველოს საპარლამენტო არჩევნებს, რომელიც 2020 წლის ოქტომბერშია ჩანიშნული.

DFRLab ატლანტიკური საბჭოს ციფრული კვლევის ლაბორატორიაა, რომელიც დეზინფორმაციის იდენტიფიცირებაზე მუშაობს.

ადამ კინზინგერი ანტიდასავლური აქტორების ყურადღების ქვეშ მაშინ მოექცა, როცა მან და სხვა კონგრესმენებმა პრემიერმინისტრ გახარიას წერილი მისწერეს და დაღმავალ ეკონომიკურ ტრენდსა და პოლიტიკურ დევნაზე გაამახვილეს ყურადღება.

ამავე თემაზე:

თუ გინდა, რომ ნამდვილი და ყალბი ამბები ერთმანეთისგან მარტივად განასხვავო და დეზინფორმაციისგან სხვებიც დაიცვა, შემოგვიერთდი ჯგუფში – ერთად ვებრძოლოთ დეზინფორმაციას.

სტატია მოამზადა On.ge-მ აღმოსავლეთ-დასავლეთის მართვის ინსტიტუტის (EWMI) ACCESS-ის პროექტის ფარგლებში. მასალის დამზადება შესაძლებელი გახდა ამერიკელი ხალხის მხარდაჭერის შედეგად ამერიკის შეერთებული შტატების საერთაშორისო განვითარების სააგენტოს (USAID) დაფინანსებით. სტატიის შინაარსზე პასუხისმგებელია On.ge. ის შესაძლოა არ გამოხატავდეს EWMI-ს, USAID-ის ან/და ამერიკის შეერთებული შტატების შეხედულებებს.