ქართული ოცნების მაჟორიტარმა დეპუტატმა და ჯანდაცვის კომიტეტის თავმჯდომარემ, დიმიტრი ხუნდაძემ ჯერ აიღარა, რომ კანონი დაარღვია, შემდეგ კი On.ge-სთან საუბრისას ეს ფაქტი უარყო. პლენარულ სესიაზე დეპუტატი ირწმუნებოდა, რომ ჰოსპიტალური სექტორის შემოწმებისას "სადეპუტატო ვალდებულება დათმო" და აღმოჩენილი დარღვევების შესახებ ინფორმაცია არ გაასაჯაროვა, რითიც მან კანონი დაარღვია, მაგრამ მორალური კანონი დაიცვა და ექიმები არ "გამოააშკარავა".

"მე ნამდვილად დავარღვიე მაშინ კანონი, მაგრამ არ დამირღვევია მორალური კანონი. თქვენ მთხოვდით, გამომეფინა ის კლინიკები, სადაც დარღვევები ნამდვილად იყო. მაგრამ მე გავითვალისწინე მორალური მხარე, რაშიც დავთმე ჩემი სადეპუტატო ვალდებულება და დავარღვიე, რომ ექიმები, რომლებიც წინა ხაზს იკავებდნენ და იბრძოდნენ, არ გამოვააშკარავე. იმიტომ რომ არ იყო ისეთი დარღვევები, რომელიც მაინცდამაინც ამის ვალდებულებას გამიჩენდა. ამ ექიმებთან მე, როგორც სადამსჯელო რაზმი კი არ ვიყავი ჩასული, მათთან ერთად ვალაგებდი, რომ კლინიკებში ინფექციის გავრცელება არ ყოფილიყო", — განაცხადა ხუნდაძემ.

ევროპული საქართველოს წევრმა, ზურაბ ჭიაბერაშვილმა ხუნდაძეს ჰკითხა, რატომ დაარღვია კანონი და არ გაასაჯაროვა ანგარიში იმის შესახებ, როგორია ჰოსპიტალური სექტორის მზაობა. ჭიაბერაშვილი ასევე, ითხოვდა, რომ ხუნდაძეს ის კრიტერიუმები გაემხილა, რომლის მიხედვითაც საავადმყოფოებს ამოწმებდა.

On.ge დაუკავშირდა დიმიტრი ხუნდაძეს იმის დასაზუსტებლად, დარღვევების შესახებ ინფორმაცია დაუმალა მხოლოდ ოპოზიციას თუ უწყებათაშორის საკოორდინაციო საბჭოსაც, რაზეც ხუნდაძემ გვიპასუხა, რომ ის დასკვნებს საბჭოს აცნობდა, თუმცა ოპოზიციასთან ამის ვალდებულება არ ჰქონია.

"მე არ მქონდა მათთან ვალდებულება, რომ მათთვის ეს გადამეგზავნა, მე ამ დასკვნებს ვაცნობდი საბჭოს და საბჭოზე ხდებოდა გადაწყვეტილების მიღება. რა ვალდებულება მქონდა, რომ ეს დასკვნები მათთვის მიმეცა, სად არ ის ეს ვალდებულება. რა თქმა უნდა, ეს [კანონის დარღვევაზე] იყო რეპლიკა. მე კანონებს არ ვარღვევ", — განაცხადა ხუნდაძემ.