დაახლოებით ერთი საათის წინ პოლიციამ დაადასტურა, რომ კალიფორნიაში მდებარე ტბა პირუში, სადაც ცნობილი მსახიობი ნაია რივერა გაუჩინარდა, ცხედარი იპოვეს.

ჯერჯერობით დადასტურებული არ არის, თუ ვისი სხეულია აღმოჩენილი.

როგორც ოფიციალურ განცხადებაში ვკითხულობთ, სამძებრო სამუშაოებთან დაკავშირებული სიახლეების შესახებ პრესკონფერენციას რამდენიმე საათში გამართავენ და დაზუსტებით გავიგებთ, ვისი სხეული იპოვეს ტბაში.

33 წლის ამერიკელი მსახიობი ნაია რივერა, რომელსაც მაყურებლები სერიალ Glee-ში შესრულებული როლით იცნობენ, 8 ივლისს გაუჩინარდა: მსახიობი ოთხი წლის შვილთან ერთად ნავით ტბაში შევიდა, მოგვიანებით კი ნავზე მხოლოდ მძინარე მცირეწლოვანი იპოვეს.

BBC-ის ცნობით, გასული ოთხი დღის განმავლობაში პოლიციელები ნაია რივერას აქტიურად ეძებდნენ, მათ შორის მყვინთავების, მაძებარი ძაღლების, შვეულმფრენებისა და სპეციალური წყალქვეშა ნავების დახმარებით.

პრესკონფერენციის გამართვის შემდეგ, როგორც კი დადასტურდება, თუ ვის ეკუთვნის ტბაში ნაპოვნი სხეული, მაშინვე მოგაწვდით განახლებულ ინფორმაციას.

განახლება: პოლიციამ დაადასტურა, რომ ტბაში ნაია რივერას ცხედარი იპოვეს.