ადგილობრივი პოლიციის სამმართველოს განცხადებით, ცნობილ სერიალ Glee-ს მსახიობი ნაია რივერა დაკარგულად ითვლება და მას ეძებენ.

როგორც სამართალდამცავები ამბობენ, 33 წლის მსახიობმა ოთხშაბათს, 8 ივლისს კალიფორნიის შტატში მდებარე ტბა პირუზე გასაცურად თავის ოთხი წლის შვილთან ერთად ნავი იქირავა. რამდენიმე საათის შემდეგ ტბაში ნავზე მყოფი ბავშვი მარტო იპოვეს, ნაია რავერა კი არსად ჩანდა.

პოლიციამ მაშინვე დახრჩობის შესაძლო მსხვერპლის ძიება დაიწყო. მალევე გაირკვა, რომ ნავზე სწორედ ეს ცნობილი მსახიობი იმყოფებოდა. ამჟამად სამძებრო სამუშაოები როგორც ტბის მიმდებარე ტერიტორიაზე, ისე წყლის ქვეშაც მიმდინარეობს.

ნაია რივერამ 2014 წელს ასევე მსახიობ რაიან დორსიზე იქორწინა და მათ 2015 წელს შვილი, ჯოსი ჰოლისი შეეძინათ. წყვილი 2018 წელს გაშორდა ერთმანეთს.

სოციალურ ქსელში სულ ბოლოს გამოქვეყნებული მისი პოსტი სწორედ შვილთან ერთად გადაღებული ფოტოა.

ნაია რივერამ მსახიობობა 4 წლის ასაკში დაიწყო: ის CBS-ის სიტკომში The Royal Family თამაშობდა. განსაკუთრებული პოპულარობა მუსიკალურმა სერიალმა Glee მოუტანა, რომელშიც 2009 წლიდან 2015 წლამდე სანტანა ლოპესის როლს ასრულებდა.

აღსანიშნავია, რომ ეს პირველი შემთხვევა არ არის, როცა ამ სერიალის მსახიობის შესახებ სამწუხარო ამბავს ვიგებთ: 2013 წელს შოუში ერთ-ერთი მთავარი როლის შემსრულებელი, კორი მონტეიტი სასტუმროს ნომერში გარდაცვლილი იპოვეს; მარკ სელინგმა კი, რომელიც ნოა პაკერმანის როლს ასრულებდა, ბავშვთა პორნოგრაფიის ფლობის გამო დადანაშაულების შემდეგ 35 წლის ასაკში სიცოცხლე თვითმკვლელობით დაასრულა.