შპს დიჯიტალ ედსს, რომელიც შპს აიმუვის.ჯის 60 პროცენტის მფლობელია, ამავე კომპანიის დარჩენილი წილისა და სააქციო საზოგადოება ITDC-ს 51 პროცენტის შესყიდვა სურს. ამისთვის საქართველოს კომუნიკაციების ეროვნული კომისიის თანხმობაა საჭირო. კომისია საკითხის განხილვას 8 დეკემბერს დაიწყებს.

შპს აიმუვის.ჯი ვებგვერდ imovies.ge-ს ფლობს, ITDC კი მის კონკურენტს - Myvideo.ge-ს. ვებგვერდები თემატურად მსგავსია. გარდა ვიდეოპროდუქციისა, ორივე ვებგვერდზე შესაძლებელია სატელევიზიო არხების პირდაპირი ტრანსლაციის ყურება. გარდა ამისა, კომპანია ITDC-ს საქმიანობის სფეროებია: ვებგვერდების, საინფორმაციო სისტემების შექმნა, IT სტრატეგიის ფორმირება და რეკომენდაციების შემუშავება.

დღევანდელი მდგომარეობით, ITDC-ს მფლობელები არიან: ააიპ ტექნოლოგიების განვითარების ცენტრი (10%), მამუკა მონავარდისაშვილი (35%), გიორგი გარსევანიშვილი (35%) და გურამ ხუნდაძე (20%). შპს აიმუვის.ჯი შოთა ჩლაიძესა (40%) და შპს დიჯითალ ედსს (60%) ეკუთვნის.

იმ შემთხვევაში, თუ კომუნიკაციების ეროვნული კომისია ამ შესყიდვაზე თანხმობას განაცხადებს დიჯითალ ედსი სრულად გახდება აიმუვის.ჯის მფლობელი და ITDC-ს აქციების 51%-ს შეიძენს. თავის მხრივ, შპს დიჯითალ ედსში 12,5-პროცენტიან წილებს ფლობენ გივი გურასპაული, ნიკოლოზ გაბელაია, ანდრო კიკნაძე და კონსტანტინე ჭავჭანიძე, დარჩენილი 51% კი ლევან ჭიორელიძეს ეკუთვნის.