ისეთი ცნობილი მწერლები, როგორებიც არიან ჯოან როულინგი, სალმან რუშდი და მარგარეტ ეტვუდი სხვა 150-მდე ავტორთან, აკადემიკოსთან თუ აქტივისტთან ერთად ღია წერილს აქვეყნებენ, სადაც "საკუთარი აზრის დაფიქსირების შეზღუდვის" თანამედროვე ტენდენციებს აკრიტიკებენ.

ღია წერილში აღნიშნულია, რომ ბოლო პერიოდში რასიზმის წინააღმდეგ მიმართულ პროტესტსა თუ სხვა სოციალური სამართლიანობის მოთხოვნებს ისინი იზიარებენ, თუმცა აღნიშნავენ, რომ ამავდროულად "მორალისტური დამოკიდებულებები და პოლიტიკური ვალდებულებები გაჩნდა, რომლებიც ადამიანებს აზრის გამოთქმას უზღუდავს", რასაც ეს ცნობილი სახეები სხვა სოციალურ უსამართლობასთან ერთად უპირისპირდებიან:

"სასურველი დემოკრატიული ინკლუზიურობის მიღწევას მხოლოდ იმ შემთხვევაში შევძლებთ, თუ ყველა იმ შეუწყნარებელ გარემოზე ვისაუბრებთ ღიად, რომელსაც ყველგან ვაწყდებით".

ღია წერილი გუშინ, 7 ივლისს Harper's Magazine-ში გამოქვეყნდა და მას უკვე ნახსენებ სახელებთან ერთად ისეთი ცნობილი ადამიანები აწერენ ხელს, როგორებიც არიან ლინგვისტი ფილოსოფოსი ნოამ ჩომსკი, ფემინისტი გლორია სტაინემი, მოჭადრაკე გარი კასპაროვი და მწერალი მარტინ ემისი.

"ინფორმაციისა და იდეების თავისუფლად გაცვლა, რაც ლიბერალური საზოგადოებისთვის სასიცოცხლოდ მნიშვნელოვანია, ყოველდღიურად უფრო იზღუდება. მიუხედავად იმისა, რომ ამას მხოლოდ რადიკალურად მემარჯვენეებისგან ველოდით, აღმოჩნდა, რომ ცენზურამ უფრო ფართოდ მოიკიდა ფეხი ჩვენს კულტურაში: საწინააღმდეგო შეხედულებების მიუღებლობა, საჯარო დამცირების ნორმად ქცევა, ადამიანების დევნა და ტენდენცია, რომ განსახილველი პოლიტიკური საკითხები ურყევ ჭეშმარიტებაში აურიონ. ჩვენ მხარს ვუჭერთ თუნდაც უკმეხი და მწვავე აზრების გამოთქმის ღირებულებას ნებისმიერ ადგილას. მაგრამ ახლა მეტისმეტად ჩვეულებრივი ნორმაა მყისიერი და მკაცრი სასჯელის მოთხოვნა განსხვავებული სიტყვისა და აზრის გამოთქმის გამო", — ვკითხულობთ წერილში.

ხელმომწერებს შორის არიან ცნობილი მწერლები ჯოან როულინგი, მარგარეტ ეტვუდი და სალმან რუშდი.

ფოტო: AP, Getty, Tim Knox

ჰარი პოტერის წიგნების სერიის ავტორი, ჯოან როულინგი ტრანსგენდერებთან დაკავშირებული საკითხების ირგვლივ გამოთქმული მოსაზრებების გამო რამდენიმე კვირის წინ ტრანსფობიაში დაადანაშაულეს და სოციალურ მედიაში მრავალმა ადამიანმა გააკრიტიკა, მათ შორის — ჰარი პოტერის ფილმების ვარსკვლავებმაც.

"რედაქტორებს კონტრვერსიული შეხედულებების გამო სამსახურიდან ათავისუფლებენ; წიგნებს კრძალავენ არაავთენტურობის ბრალდებით; ჟურნალისტებს კონკრეტულ თემებზე წერა აკრძალული აქვთ; ლექტორების მიერ ლიტერატურული პერიფრაზის მოყვანის გამო გამოძიება იწყება; მკვლევრებს ცუდი გამოხმაურების მქონე აკადემიური ნაშრომის გამო სამსახურებიდან ითხოვენ და ორგანიზაციის ხელმძღვანელებს თავიდან მხოლოდ იმ შეცდომების გამო იშორებენ, რაც შეიძლება ნებისმიერმა უნებლიედ დაუშვას", — აღნიშნულია წერილში, რომელსაც ჯოან როულინგიც აწერს ხელს.

ჯოან როულინგის განცხადებით, ის ამაყია, რომ ამ წერილს ხელს აწერს.

განცხადების ავტორებს შორის არიან New York Times-ის ჟურნალისტები დევიდ ბრუკსი და ბარი ვაისი. აღსანიშნავია, რომ ცოტა ხნის წინ სწორედ ამ გამოცემის რედაქტორი გაათავისუფლეს სამსახურიდან რესპუბლიკელი სენატორის ტომ კოტონის შესახებ გამოთქმული მოსაზრების გამო.

ხელმომწერებს შორისაა კიდევ ერთი ცნობილი გამოცემის Vox დამფუძნებელი მეთიუ იგლესიასი, რასაც მისი ერთ-ერთი თანამშრომლის მხრიდან უარყოფითი გამოხმაურება მოჰყვა: ტრანსგენდერი ქალის ემილი ვანდერვეფის განცხადებით, ის ამის გამო Vox-ში თავს "ნაკლებად უსაფრთხოდ გრძნობს".

ღია წერილს ურთიერთსაწინააღმდეგო შეფასებები მოჰყვა, რის გამოც ერთ-ერთმა ხელმომწერმა გამოქვეყნებიდან მალევე მოითხოვა, რომ ხელმომწერთა სიიდან ამოეღოთ: ამერიკელი მწერლისა და ტრანსგენდერი აქტივისტის, ჯენიფერ ფინის განცხადებით, "არ იცოდა, თუ ვინ აწერდა ხელს კიდევ ამ წერილს".