პარლამენტში ქართული ოცნების ყოფილი დეპუტატი, დიმიტრი ცქიტიშვილი ფიქრობს, რომ ამერიკელი კონგრესმენის მარკუეინ მალინის შეფასება, რომ ივანიშვილი პუტინის მოკავშირეა არასწორია. თუმცა, დეპუტატი ამერიკაში კრიტიკის გაძლიერებას შემაშფოთებელს უწოდებს. ამ თემას კომენტარს მთავარი არხი ავრცელებს.

"მგონია, რომ მისი ეს შეფასება არ არის სწორი ერთის მხრივ, თუმცა ძალიან შემაშფოთებელია ის, რომ ამერიკის კონგრესში და ზოგადად ამერიკის პოლიტიკურ ესტაბლიშმენტში ძალიან მომძლავრდა საქართველოს მიმართ კრიტიკა. ამას სჭირდება კონკრეტული წერილები ან მესიჯების გაგზავნა არამედ კონკრეტული ნაბიჯების გადადგმა იმისთვის, რომ მთელი მსოფლიო დარწმუნდეს საქართველოს ხელისუფლების დემოკრატიულობისკენ მისწრაფებების გულწრფელობაში", — თქვა დიმიტრი ცქიტიშვილმა.

ამერიკელი კონგრესმენი, მარკუეინ მალინი ბიძინა ივანიშვილის შესახებ წერილს აქვეყნებს, სადაც მას "პუტინის მოკავშირეს" უწოდებს. კონგრესმენის ბლოგი გამოცემა The Hill-ზე გამოქვეყნდა. წერილში საუბარია ბიძინა ივანიშვილის წარსულზე, რუსეთში დაგროვებულ ქონებასა და "პუტინთან მოკავშირეობაზე".

"საქართველოს აკონტროლებს რუსეთში განათლებამიღებული ოლიგარქი, ბიძინა ივანიშვილი, რომელმაც მილიარდიანი ქონება დააგროვა საბჭოთა კავშირის დაშლის შემდეგ მიტოვებულ, კორუფციულ რუსულ ინდუსტრიაში. [...] ივანიშვილის ძალაუფლების კონსოლიდაცია მხოლოდ საქართველოს მთავრობით არ შემოიფარგლება. პუტინის მოკავშირე აქტიურად მუშაობს ქვეყანაში კანონიერად მომუშავე ამერიკული ბიზნესის განსადევნად", — წერს კონგრესმენი და ამ კონტექსტში მაგალითად მათ შორის, ფრონტერას საქმე მოჰყავს.

მის ბლოგში საუბარია იმაზეც, რომ 8 მარტის შეთანხმების ბოლომდე შესრულება კითხვის ნიშნის ქვეშ დგას. მისი თქმით, შეთანხმება პოლიტპატიმრების გათავისუფლებასაც ითვალისწინებდა.