ფეხბურთელ გიორგი შაქარაშვილის გარდაცვალების საქმეზე რამდენიმე პირია დაკავებული. სპეცოპერაცია დღეს, 26 ივნისს დილით ჩატარდა. ერთ-ერთი დაკავებულის ადვოკატი, დავით ჭიკაიძე ჟურნალისტებთან საუბარში ამბობს, რომ სავარაუდოდ, მისი დაცვის ქვეშ მყოფს ბრალს სისხლის სამართლის კოდექსის 126-ე, ძალადობის მუხლით წარუდგენენ.

"ჩემი დაცვის ქვეშ მყოფი წვეულებაზე იყო თავიდანვე, ის როგორც კი სიტუაცია დაიძაბა მალევე წამოვიდა ტერიტორიიდან, შესაბამისად ის უბედური შემთხვევის დროს ადგილზე არ იყო, იყო ლისის ტერიტორიაზე. დღეს დილის 8 საათზე დააკავეს", — ამბობს ადვოკატი დავით ჭიკაიძე.

გარდაცვლილის ბიძამ, მირიან ნიკოლაძემ ფორმულასთან ინტერვიუში განაცხადა, რომ დაკავებულია 17 პირი:

"გიდასტურებთ და ვიცი, რომ დაკავებულია 17 პირი ვაფასებ დადებითად იმიტომ, რომ პასუხი უნდა აგოს ყველა დამნაშავემ, ვინც ჩაიდენს დანაშაულს. დაკავებულების რაოდენობა, ბუნებრივია, გამომდინარეობს იქედან, რამდენიც მონაწილეობდა ამ დანაშაულის, როგორც ჩადენაში, ისე ორგანიზებაში".

შინაგან საქმეთა სამინისტრომ თანამშრომლობისკენ მოუწოდა ყველას, ვინც ამ საქმესთან დაკავშირებით რაიმე სახის ინფორმაციას ფლობს.

22 ივნისს, 4-დღიანი ძებნის შემდეგ, მყვინთავებმა ფეხბურთელ გიორგი შაქარაშვილის ცხედარი წყალში იპოვეს. საგანგებო სიტუაციების მართვის სამსახურის ინფორმაციით, საძიებო სამუშაოებში ჩართული იყო 70 მეხანძრე-მაშველი, 7 ნავი და ორი სპეციალური კატერი, რომელიც ფსკერის სკანირებას ახორციელებდა.

ოჯახმა უწყებას ფეხბურთელ, გიორგი შაქარაშვილის დაკარგვის შესახებ 19 ივნისს, დაახლოებით 11 საათზე შეატყობინა.

გაიგეთ მეტი: