კინოთეატრები დახურულია? გეიმერებისთვის ეს პრობლემას სულაც არ წარმოადგენს: საყვარელი ფილმების სეანსებზე დასწრება ვირტუალურად შეეძლებათ.

26 ივნისს ონლაინ ვიდეოთამაშ Fortnite-ში ერთ-ერთი ყველაზე ცნობილი თანამედროვე რეჟისორის, კრისტოფერ ნოლანის სამი გახმაურებული ფილმის ჩვენება გაიმართება: The Prestige, რომელშიც ჰიუ ჯეკმანი, სკარლეტ იოჰანსონი და კრისტიან ბეილი თამაშობენ; ბეტმენის საკულტო ტრილოგიის ფილმი Batman Begins და 2010 წელს გამოსული Inception ლეონარდო დიკაპრიოს მონაწილეობით.

ფილმების ჩვენება ამ ონლაინ თამაშში კუნძულ Party Royale-ზე დიდ ეკრანზე გაიმართება. ამის შესახებ ინფორმაცია კომპანია Epic Games-მა გაავრცელა.

ამ ერთგვარი ფილმების ვირტუალური მინიკინოფესტივალი დაანონსებამდე, რამდენიმე კვირით ადრე Fortnite-ში კრისტოფერ ნოლანის ახალი ფილმის ტრეილერის პრემიერა შედგა.

Tenet-ის ახალი ტრეილერის ჩვენება Fortnite-ში.

ფოტო: Family Game Review / YouTube

სამწუხაროდ, ფილმების ჩვენება ყველა ქვეყანაში თანაბრად ხელმისაწვდომი არ იქნება. Epic Games-ის ვებგვერდზე Fortnite-ის მოთამაშეებს შესაძლებლობა აქვთ გაიგონ, თუ რომელი ქვეყნიდან შეეძლებათ ფილმების ნახვა და დროის რომელ კონკრეტულ მონაკვეთში.

"ყველა ქვეყანაში სხვადასხვა ფილმის ჩვენების უფლებაზე დისტრიბუტორ კომპანიებს განსხვავებული მოთხოვნები აქვთ. ამ პირველი სატესტო მცდელობისას ძალიან ვეცადეთ, რომ მაქსიმალურად ბევრ ადამიანს გამოეცადა ეს ახალი შესაძლებლობა. ეს კი დამოკიდებულია იმაზე, თუ რომელ ქვეყანაში ცხოვრობთ და სამწუხაროდ, ჩვენ არ შეგვიძლია, რომ ყველასათვის თანაბრად ხელმისაწვდომი გავხადოთ ის", — აცხადებენ თამაშის წარმომადგენლები.

როგორც Variety წერს, ეს პირველი შემთხვევა არ არის, როცა Fortnite-ში მსგავსი სახის ღონისძიება იმართება: აპრილში ჰიპ-ჰოპ მომღერლის ტრევის სკოტის ვირტუალური კონცერტი გაიმართა, რომელმაც რეკორდი მოხსნა და 12,3 მილიონი მსმენელი ჰყავდა.

როგორც ჩანს, ახალი შესაძლებლობების ძიება ვირტუალურ სივრცეებში კიდევ უფრო აქტუალური ხდება, განსაკუთრებით კი მაშინ, როცა პანდემიის გამო ადამიანების ჩვეული ცხოვრების წესი რადიკალურად იცვლება.

ონლაინ ვიდეოთამაშ Fortnite-მა 2017 წელს იხილა მზის სინათლე და დღეს უკვე 350 მილიონზე მეტი მომხმარებელი ჰყავს.