თუ არ გჯერათ, რომ მრავალი რჩევისა და რეკომენდაციების მიუხედავად კარანტინში გატარებული დრო ბევრს სულაც არ გაუტარებია ახალი ცოდნის მიღებასა თუ დასახული მიზნების მიღწევაში, ჯორჯ მარტინი ამჯერადაც გაგაოცებთ: როგორც თავად მწერალი ამბობს, პანდემიის პერიოდი ნაყოფიერად გამოიყენა და დროის დიდი ნაწილი ახალ წიგნზე მუშაობაში გაატარა.

23 ივნისს პირად ბლოგზე გამოქვეყნებულ ტექსტში ეს ცნობილი ამერიკელი მწერალი აღნიშნავს, რომ იზოლაციის ბოლო რამდენიმე თვე თავისი ფენტეზის ჟანრის საკულტო წიგნების სერიის ყინულისა და ცეცხლის სიმღერა, რომლის მიხედვითაც HBO-მ მსოფლიოში ერთ-ერთი ყველაზე პოპულარული სერიალი Game of Thrones გადაიღო, ახალ ნაწილზე მუშაობაში გაატარა.

"ყოველდღე ზამთრის ქარების დასაწერად რამდენიმე საათს ვატარებ და უკვე ნამდვილად წინ წავიწიე. გუშინ ახალი თავის წერა დავასრულე, კიდევ ერთი თავი სამი დღის წინ დავწერე, კიდევ სხვა კი გასულ კვირას. მიუხედავად ამისა, ეს იმას არ ნიშნავს, რომ წიგნი ხვალ ან შემდეგ კვირას მზად იქნება გამოსაქვეყნებლად. ეს მოცულობით დიდი ნაწილი იქნება და კიდევ დიდი გზა მაქვს მის დასრულებამდე გასავლელი. ზოგიერთ დღეს უფრო ნაყოფიერად ვმუშაობ, ხანდახან კი პირიქით, მაგრამ, რაც მთავარია, ვმუშაობ და კმაყოფილი ვარ იმით, რასაც ვაკეთებ", — წერს ჯორჯ მარტინი.

მწერალმა ამ ცნობილი სერიის ჯერჯერობით ბოლო, მეხუთე წიგნი A Dance with Dragons (დრაკონებთან ცეკვა) 2011 წელს გამოუშვა და მას შემდეგ ერთგული მკითხველები მოუთმენლად ელიან, რომ მარტინი გაგრძელებას დაწერს. ჯერჯერობით, ეს ლოდინი უშედეგოა.

ამის მიუხედავად, ჯორჯს მარტინი იმდოვნებს, რომ 2021 წელს კორონავირუსის პანდემია დასრულდება, ამავდროულად კი თავად ამ ახალ წიგნზე მუშაობას დაასრულებს.

ჯორჯ მარტინი სერიალ Game Of Thrones-ის მსახიობებთან ერთად 2009 წელს.

ჯორჯ მარტინი სერიალ Game Of Thrones-ის მსახიობებთან ერთად 2009 წელს.

ფოტო: ADAM WHITEHEAD

ყინულისა და ცეცხლის სიმღერის ერთგულმა მკითხველებმა კარგად იციან, რომ ეს პირველი შემთხვევა არ არის, როცა ავტორი გვპირდება, რომ მალე ახალ წიგნზე მუშაობას დაასრულებს.

მიუხედავად ამისა, იმ ფანებს, რომელთაც 2019 წელს Game of Thrones-ის ფინალურმა სეზონმა გული დასწყვიტა, ლოდინის გარდა სხვა არც არაფერი დარჩენიათ, რათა ამ ისტორიის შემოქმედმა მაინც შესთავაზოს ყველას ამ შთამბეჭდავი ისტორიის ღირსეული დასასრული.

ფოტო: Tumblr